Siglir tar il cuntegn

Header

cuntegn

Chantun Cooperaziun tar l'instrucziun da protecziun civila

Ils chantuns Grischun e Glaruna vulan realisar communablamain l'instrucziun da las persunas da la protecziun civila. Per endirir quest intent han il cusseglier guvernativ Christian Rathgeb e ses collega glarunais Andrea Bettiga suttascrit oz ina cunvegna.

Sco chantuns muntagnards han ils dus chantuns Glaruna e Grischun basegns sumegliants en il sectur da la protecziun civila. Ina cooperaziun en l'instrucziun da protecziun civila saja damai mo stada la consequenza logica, uschia la regenza en ina communicaziun a las medias.

La cunvegna regla la realisaziun cuminaivla da l'instrucziun da basa, da cader e da spezialists – sco era ils curs da furmaziun supplementara e da repetiziun.

La scolaziun è per regla a Cuira

Quai che pertutga ils instructurs da protecziun civila, sto mintga chantun metter a disposiziun tants ch'i correspunda a la proporziun da participants. Lieu ha l'instrucziun per regla en il center da protecziun civila Meiersboden a Cuira.

Ina cumissiun da surveglianza fixescha e controllescha ils standards da qualitad unitars per la scolaziun. Questa cumissiun consista dals directurs dals uffizis e dals manaders da la partiziun «instrucziun da protecziun civila» dals chantuns da cunvegna.

RR novitads 14:00

Artitgels legids il pli savens