Igl è bunamain ina duplicaziun – la destinaziun da Lai noda il matg numnadamain in plus da 91,9% en congual cun il matg da l'onn passà. Quai malgrà che las pendicularas èn stadas serradas. Plinavant n'eran er betg daplirs hotels averts che l'onn avant. Bruno Fläcklin, directur da turissem da la destinaziun è persvadì che l'augment saja da contribuir al desideri da bandunar las citads e sa sentir pli segir cunter il virus en las muntognas.
Avert pli baud en vista als firads
Cun 73,6% dapli pernottaziuns hai era dà in ferm plus ad Arosa. «Sis hotels han avert a curta vista lur portas en vista d'Anzainza e Tschunchaisma. Vinavant èsi stà bell'aura e blers giasts han tschertgà ina destinaziun en Svizra empè da l'exteriur», numna il directur da cura d'Arosa Pascal Jenny, sco motivs.
Nagins viadis da fatschenta, naginas gruppas
Cuira ha persuenter pers massivamain pernottaziuns durant il matg (-76,2%). La sperdita è spezialmain greva perquai ch'il matg tutga tar la stagiun principala, sco quai che Leonie Liesch, directura da Cuira turissem, explitgescha. Per ella è la gronda perdita da pernottaziuns cleramain ina consequenza dal coronavirus: I manchian ils giasts sin viadis da fatschenta, giasts da l'exteriur ed er ils viadis en gruppas.
Gronda fluctuaziun è normal durant stagiun morta
Jan Steiner da la destinaziun Engiadina San Murezzan relativescha il minus da var 63,9%. Il mais da matg saja per els per il solit flaivel e betg uschè relevant per la stagiun. Il martgà internaziunal ch'è crudà ensemen quasi cumplettamain ha tenor el chaschunà il ferm minus. Er represchentants d'autras destinaziuns din che las cifras dal mais da matg na dian betg or uschè bler. Tuttina sco il november sa tractia quai d'in mais da stagiun morta. Lura dettia savens gronda varianza da cifras.