Siglir tar il cuntegn

Header

cuntegn

Corona e las finanzas La PCD pretenda in rapport da la regenza

La regenza è pronta da far in rapport davart l'influenza da la pandemia da corona sin las finanzas chantunalas. Quai sin incumbensa da la fracziun cristiandemocratica en il Cussegl grond.

  • Tge consequenzas finanzialas spetga la regenza a curta vista da la pandemia da corona?
  • Tge consequenzas finanzialas spetga la regenza a pli lunga vista per la cassa chantunala?
  • En tge scenaris pensa il chantun d'impedir ina sballantscha per las finanzas publicas?

Sin questas trais dumondas vuless la PCD survegnir ina resposta da la regenza. E la regenza è pronta da respunder a questas dumondas en in rapport. Ella scriva dentant, ch'i saja a media ed a lunga vista grev, er suenter la pandemia, da far prognosas cunquai che la malsegirtad da las entradas sco era da las extradas saja fitg gronda.

A curta vista

Per il preventiv da l'onn 2021, ha la regenza sulet previs in credit da 2,6 milliuns en connex cun la pandemia, quai per la partiziun da corona en l'Uffizi da sanadad. Las dumondas per credits poste­riurs vegnan examinadas e fatgas tut tenor la situaziun e tenor ils criteris da la necessitad ed urgenza. Per l'onn 2021 gidan retgavs supplementars considerabels da la Banca naziunala svizra. Co che la situaziun sa preschenta il mument dependa dentant da l'ulteriur svilup da la pandemia.

Concept per garantir equiliber a lunga vista

A partir dal 2022 daventa il rom finanzial pli e pli stretg. I dettia cunfins stretgs per surpigliar novas incumbensas che n'èn betg conside­radas en il plan da finanzas e che han consequenzas finanzialas e persunalas. La finamira è da tegnair en equiliber las finanzas chantunalas. Il proceder per quest intent ha la regenza fixà en il concept per garantir a lunga vista l'equiliber da las finanzas.

Rapport december 2021

Il Cussegl grond decida en ina da las proximas sessiuns sch'el vuless surdar l'incumbensa a la regenza u betg. Il rapport vul la regenza lura preschentar a chaschun da la sessiun dal december 2021.

RTR novitads 12:00

Artitgels legids il pli savens

Scrollar a sanestra Scrollar a dretga