Entaifer las davosas 24 uras hai dà 30 novas infecziuns cun il coronavirus en il Grischun. Quai ha ditg Rudolf Leuthold, il manader da l’Uffizi chantunal da sanadad, envers RTR. La gronda part da quellas infecziuns stettian en connex cun il champ da giuvenils a Parpan. Il dumber exact n’ha el anc betg savì dir. Quai sclerescha l’uffizi il mument cun agid dal contact tracing.
La gievgia è vegnì enconuschent, ch’il coronavirus è sa derasà en in champ da giuvenils cun 100 persunas tranter 9 e 13 onns.
Per il mument sa chattan en Grischun 34 persunas en isolaziun, 235 e quarantina e duas en l'ospital.
En l'entira Svizra ed en il Principadi dal Liechtenstein hai dà entaifer in di 154 infecziuns novas – quai èn 37 dapli cumpareglià cun il di avant. L'Uffizi federal da sanadad BAG ha plinavant annunzià sis novs mortoris pervi da Covid-19. Il dumber total dals mortoris è creschì sin 1'700.
