Il minister da sanadad Peter Peyer ha declerà envers RTR ils trais scenaris:
- Las cifras restan bassas sco enfin uss
- Las cifras creschan exponenzial ed il sectur da sanadad vegn als cunfins
- I dat uschenumnads events da «superspreader» locals ubain regiunals
Tut tenor tge scenari che daventa realitad, ha il chantun preparà mesiras. Quai possia esser per exempel: Serrar ina scola, relaschar in obligatori da mascras per ina regiun ubain metter ina gruppa da persunas en quarantina.
Reglas unifitgadas per arranschaments gronds
La Confederaziun veglia avair per tut ils chantuns medemas reglas per pudair organisar a partir da l'october events gronds, ha declerà Peter Peyer en il Cussegl grond. Quest concept duai esser sin maisa l'entschatta settember.
Per Peter Peyer ha quest agir coordinà dentant era cunfins – gist per events da sport en il Grischun.
Per gieus da hockey èsi pussaivel d'occupar be mintga segunda sutga sin tribuna. Quai na funcziuna dentant betg per cursas da biatlon ubain per il maraton da skis.
Cura ch'il concept federal saja sin maisa, veglia el analisar quel e contactar ils organisaturs grischuns per discutar, tge mesiras da protecziun che fissan adattadas.
Naginas cifras tenor vischnancas
L'uffizi da sanadad na vegn er en l'avegnir betg a publitgar datas da persunas pertutgadas dal coronavirus ch'èn en isolaziun, en quarantina u ch'èn returnadas da pajais da ristg. I manca numnadamain la basa legala per quai.
A questa conclusiun vegn il protectur da datas dal chantun che ha analisà la situaziun en il Grischun. Las datas davart la sanadad da singulas persunas vegnian numnadamain qualifitgadas sco datas che sajan spezialmain degnas da vegnir protegidas. Talas datas possian be vegnir communitgadas, sch'i dettia ina basa legala, che permettia quai.
Il minister da sandad Peter Peyer metta era en dumonda, tge che cifras tenor vischnancas portian insumma.
Nus na vulain betg che la glieud cumenza a controllar lur vischins ch'èn eventualmain infectads. Quai dat ina curiusa atmosfera.
Il chantun veglia dentant meglierar l'infurmaziun a las vischnancas, sch'i dat en lur territori bleras infecziuns. Las vischnancas avevan crititgà d'avair intervegnì ord las medias ch'i haja dà cas da corona.
Stan actual da corona
En il Grischun sa chattan actualmain 32 persunas en isolaziun e var 147 persunas en quarantina. Actualmain na sto nagin vegnir tgirà en in ospital grischun pervi da Covid-19. Tras quai ch'ils contact tracers sajan intervegnids svelt en cas da novas infecziuns, saja stà pussaivel da controllar e d'interrumper svelt las chadainas d'infecziun, scriva il chantun.
