Il chantun Grischun annunzia 6 infecziuns novas dal coronavirus entaifer in di. En tut dumbra il chantun uss 1'000 cas confermads da Covid-19 – quai dapi l'entschatta da la pandemia.
Actualmain sa chattan 138 persunas en quarantina en il Grischun, 31 en isolaziun. En ils ospitals grischuns na sto actualmain nagin vegnir tractà pervi da Covid-19.
BAG annunzia 376 novs cas
Per l'entira Svizra annunzia il BAG 376 novs cas d'infecziun per las ultimas 24 uras. Il venderdi eran quai 340, la gievgia 361 e la mesemna 383 novs cas confermads.
Tenor il BAG èn actualmain 1'737 en isolaziun pervi d'ina infecziun cun il coronavirus e pervi dal contact tracing sa chattan 5'024 persunas en quarantina. Ulteriuras 11'885 persunas èn en quarantina, perquai ch'ellas èn turnadas d'in pajais da risico.
Enfin oz èn mortas en Svizra ed il Principadi dal Liechtensein 1'725 persunas ch'eran testadas positiv sin Covid-19. Tut en tut hai dà dapi l'entschatta da la pandemia 41'722 cas da Covid-19 confermads.
