Il commerzi liber vegn sut las rodas da Covid-19. Quasi mintga pajais guarda mo per sai. La schurnalista da la Handelszeitung, Seraina Gross, enumerescha dus exempels gravants:
- L'india, in dals impurtants producents da genericas ed antibiotica, scumonda l'export da radund 30 medicaments
- L’Uniun europeica limitescha l'export da mascras e vestgids da protecziun
Era la Svizra restrenscha il commerzi liber ed ha suttamess l'export da medicaments da respiraziun ad ina lubientscha.
Quai è il grond drama da questa pandemia
I na giaja la finala betg per l’export da termagls, mabain per medicaments cunter malsognas. Ils pajais stuessan en sasez augmentar las capacitads da producziun. Empè da gliez emprovia mintgin – per part cun metodas brachialas – da pudair tiers sin il martgà mundial pli svelt dapli rauba medicinala che tschel. Gliez mainia ad ina perdita da confidenza tranter ils stadis che saja engravanta.
I giess era auter
Otg pajais mussian ch'i giaja era auter. Quests pajais sajan s'obligads da betg impedir l'export, di Seraina Gross. Da la partida sajan era dus gronds sco l'Australia ed il Canada ed i saja da sperar che l'exempel fetschia strada.
Nagin pajais – era betg l'USA u la China – dumogna sulet questa pandemia. Quai reussescha be communablamain.