Siglir tar il cuntegn

Header

cuntegn

Covid-19 e la farmazia svizra Puncto medicaments top – puncto vaccin flop

Ils dus gronds concerns da farma svizzers sa cumprovan, sch’i va per metter a disposiziun tests u medicaments cunter Covid-19. Puncto vaccins na san els dentant betg tegnair pitg.

Tgi chatta l'emprim medicament u l'emprim vaccin? Millis da perscrutaders bratgan en concerns da farma, en instituts universitars u en start-ups per cumbatter Covid-19. Era la farmazia svizra è en cursa.

Gida il medicament d'artritis?

Damai ch'i n'exista anc nagin medicament specific per tractar pazients cun Covid-19, applitgeschan ins medicaments per autras malsognas – per exempel da HIV u da malaria. Qua han ils dus concerns da farma svizzers bunas cartas.

Novartis porschia in medicament cunter malaria, di Seraina Gross che scriva per la Handeslzeitung davart la branscha farmaceutica. Tant Roche sco er Novartis fetschian era studis clinics per eruir sche ulteriurs medicaments existents gidian per tractar l'infecziun dal lom:

  • Roche cun in medicament d'artritis
  • Novartis cun in medicament da cancer

Tscherts pazients cun Covid-19 demussian ina surreacziun dal sistem d'immunitad, explitgescha Seraina Gross. Ins speria che tant il medicament d'artritis sco era quel da cancer gidian cunter questa surreacziun.

Medicament specific cunter Covid-19

Era pitschnas firmas da farma, instituts universitars ed ospitals perscruteschan.

In start-up a Schlieren sviluppescha in medicament cunter Covid-19
Autur: Seraina Grossspezialista da farmazia tar la Handelszeitung

Quest start-up haja chattà in medicament cunter Alzheimer ch'obtegnia forsa proximamain l'admissiun, di la schurnalista da la Handelszeitung. Ed uss haja il start-up cumenzà a tschertgar in medicament specific cunter l'infecziun cun il coronavirus.

Dira fatschenta cun vaccins

Puncto vaccins èn firmas pitschnas ed instituts universitars pli activs ch'ils gronds concerns da farma svizzers. In team en l'Inselspital a Berna fa per exempel da preschent tests cun in vaccin ch'è sa cumprovà tar mieurs.

Roche desista gia dapi onns da la fatschenta da vaccins e Novartis ha vendì sia sparta da vaccins avant tschintg onns.

Vaccins èn ina dira fatschenta cun pitschnas marschas
Autur: Seraina GrossSpezialista da farmazia tar la Handelszeitung

RTR actualitad 07:00

Artitgels legids il pli savens

Scrollar a sanestra Scrollar a dretga