En las duas butias dal Plantahof saja il gudogn creschì. Durant tscherts dis saja la svieuta trais giadas uschè gronda sco normalmain, declera il manader dal manaschi sin il bain puril Rolf Hug. Tenor el èn las raschuns persuenter differentas. El manegia che la glieud vul evitar la fulla da glieud tar ils grossists. Vinavant haja dà intginas cumpras da panica per aliments da basa, sco per exempel tartuffels che sa vendian anc adina fitg bain. Ultra da quai fetschian blers Homeoffice ed uschia sa vendian era dapli victualias cunquai ch’ins maglia plitost a chasa ch’en in’ustaria, concluda Hug.
Las abitaziuns da vacanzas èn emplenidas
Rafael Derungs maina cun sia famiglia in bain puril a Surcasti en la Val Lumnezia. Speras han els ina butia nua ch’ins sa servir sasez. El haja discurrì cun plirs clients che vegnian adina puspè sperasvi ed ha vesì ch’i sa tracta da blers possessurs d’abitaziun da vacanzas. I dettia numnadamain blers esters che fetschian ussa Homeoffice e dovrian in u l’auter aliment. El craja ch’els vendian ussa 25% dapli victualias sur quella butia.
En la Bassa datti in boom
Jolanda Egli da Steinmaur en il chantun Turitg ha clients tut a dubel. Sin ses bain puril maina ella ina pitschna butia. Cunter saira sajan blers dals regals vids. Uschia stoppia ella cun ses team producir dapli. Uschia cumenzia ella pli baud la damaun cun la lavur.
La sonda damaun avant l’avertura da la butia, spetgavan gia 5 persunas ordvart.
Schegea ch’els hajan ussa dapli clients e savessan uschia vender anc dapli rauba, na veglian els betg extender lur purschida da products. «Nossa filosofia èsi da porscher products regiunals. E perquai na vegnin nus betg a porscher palpiri da tualetta u bananas».