7'100 expositurs ord passa 100 pajais preschentan ovras a la fiera da cudeschs a Francfurt. Spitgads vegnan circa 275'000 visitaders. Ed entamez: cudeschs rumantschs.
Preschentar e barattar experientschas
La Chasa Editura Rumantscha (CER) preschenta otg ovras a Francfurt. Tras la preschientscha spera ella da pudair far reclama. Sco Anita Capaul la manadra da la CER di, saja dentant era impurtant da barattar experientschas cun autras persunas da la professiun. Ils emprims dis n'è la fiera numnadamain betg publica e sulettamain averta per editurAs sco era per schurnalistAs e sviluppaders da products novs.
Cudeschs rumantschs preschentads a Francfurt èn per exempel l'ovra «Alfons Tuor. Poesias» da Renzo Caduff, «Sez Ner» dad Arno Camenisch sco er il cudesch d'uffants «Il grond sgol da Marmottin» da Heinz Lüthi e Patrick Mettler.
Pliras chasas edituras vid in stan
Las ovras da la CER vegnan preschentadas vid il stan da Graubünden Books. A questa uniun fan part diversas chasas edituras dal Grischun. Uschia possian els partir ils custs per il stan, di Anita Capaul.