Siglir tar il cuntegn

Chantun Cuira - il «Capricorn» è mort

Ina discordia tranter vischins para da metter fin al project «Capricorn». Cun quel vuleva la possessura da l’edifizi, l’AXA Winterthur, substituir il fabricat existent. Uss scriva l'AXA da vulair inoltrar in settember 2016 ina dumonda da sanaziun.

L'anteriur bajetg dal Globus a la staziun a Cuira.
Legenda: L'anteriur bajetg dal Globus a la staziun a Cuira. RTR, I. Jaeger

Uss planisescha la possessura da l'edifizi, l'AXA Winterthur, ina sanaziun cumpletta per il cumplex da bajetgs Steinbock. Per quest intent vegnia ella ad inoltrar ina dumonda il settember da quest onn, scriva l'assicuranza en ina communicaziun a las medias.

Nus deplorain da betg pudair realisar ils bajetgs novs da valur architectonica. Ussa faschain nus tut per ch'i dettia tuttina ina zona attractiva e viva en quest lieu central da Cuira.
Autur: Ernst SchaufelbergerHead Real Assets AXA Investment Managers Schweiz AG

Tenor la communicaziun da l'assicuranza è la raschun per il naufragi dal project ina discordia cun il vischin. La «soluziun elavurada» avessia dumandà in consentiment en il dretg da vischin. Ils discurs correspundents n'hajan dentant betg pudì vegnir finids cun success.

Crap da stgarpitsch è stada la distanza dad 11 meters cun il bajetg vischin che tutga a la gruppa Foppa. Quella distanza è prescritta en la lescha da bajegiar e fiss stada en urden per la gruppa Foppa. L'idea ord vista dal maletg da la citad era dentant da far pli pitschna questa distanza tranter ils bajetgs e quai avess duvrà il consentiment da la gruppa Foppa. Perquai che la valur da ses bajetg fiss dentant diminuida tras ina pli pitschna distanza n'ha la gruppa betg dà il consentiment.

Cun la distanza pli pitschna avess ins vulì dar a la part davos encunter la Steinbockstrasse ina pli biala cumparsa. Sch'il bajetg vegniss construì nov cun la distanza dad 11 meters na reussiss quai betg. Perquai ha l'AXA Winterthur decidì da renovar enstagl da construir da nov.

Las lavurs actualas

Actualmain vegn allontanada l'infrastructura dals fittaders anteriurs. A medem mument dettia quai in’evaluaziun per eventualas substanzas nuschaivlas, scriva la Südostschweiz. Las lavurs progredeschian tenor plan e l’AXA speria da pudair cumenzar cun la sanaziun cumpletta senza pli grondas interrupziuns. Las novas localitads duain lura vegnir duvradas per gastronomia e vendita, sco biros ed abitaziuns.

Oriundamain preveseva l'AXA da strar giò tut il complex d'edifizis e da constuir cun il project «Capricorn» dus edifizis novs. «Capricorn» era il project victur dad ina concurrenza d'architectura.

Vid dapi il favrer

Dapi ch'ils 18 locataris han stuì bandunar l'edifizi sin il cumenzament da favrer è il bajetg voluminus amez la citad da Cuira vid. Cun las firmas èn era partidas diversas persunas or dal cor economic da la citad. Mo il Globus aveva 90 emploiads. L'AXA aveva 45 collavuraturs. L'assicuranza planisescha dentant da returnar al lieu.

RR novitads 14:00