Passa 530'000 persunas vivevan il 2014 en paupradad en la Svizra. Quai ha l'Uffizi federal da statistica eruì. Per il chantun Grischun na datti betg cifras exactas pertutgant la povradad. 1,2 pertschient dals Grischuns han dentant retratg agid social il 2014. I dat pia persunas che ston vegnir ora cun pauc ed en mintga cas senza luxus.
Café Georgina: in zic luxus
En il café Georgina a Cuira, che vegn manà da l'organisaziun Caritas, pon questas persunas cun in budget fitg limità giudair in café en in ambient chaud e patgific. In café ed in capuccino custan per exempel 2 francs.
Avert per tuts
Per pudair profitar dals pretschs favuraivels ston ins dentant posseder ina charta da la Caritas. Uschè ina survegnan per exempel persunas che prendan encunter agid social u che retiran ina assicuranza per invaliditad cun prestaziuns supplementaras. Tgi che n’ha betg uschè ina charta paja per exempel 3.80 francs per in café ni 1.20 francs per in cornet da paintg empè da 80 raps.
Café da sentupada
Ursi Kurmann maina ensemen cun duas autras dunnas il café en la stizun da la Caritas a la Tittwiesenstrasse 27. Per ella è il café Georgina in lieu da sentupada per tut las persunas, betg mo per clientas e clients cun la charta da la Caritas. Ella spera da pudair beneventar anc dapli giasts en il futur.
