Siglir tar il cuntegn

Header

cuntegn

Chantun Cuira - moviment tar l’anteriur Globus

La possessura da l’areal, l’Axa-Assicuranzas, vul far vinavant. Ella vegn ad inoltrar la dumonda da fabrica correspundenta l’entschatta da la stad. Quai ha ditg la pledadra da medias da l’Axa sin dumonda. Dapi ch’ils 18 locataris han stuì far fagot na fa il cumplex d’edifizis betg pli parada.

Il cumplex d'edifizis da la vart da la "Steinbockstrasse" RTR, I. Jaeger

Ch'il cumplex d’edifizis a la plazza da la staziun a Cuira na fa betg propi parada, para dad esser enconuschent era a sia possessura, l'assicuranza Axa Winterthur. La pledadra da medias da l'assicuranza di, ch'i saja en l’interess da tut ils participads ch’il fabricat na restia betg memia ditg vid.

Rumir il matg - construir l'atun

Perquai planiseschia l'assicuranza da cumenzar il matg cun rumir tecnica, installaziuns e tut las parts da l’edifizi che n’èn betg d'impurtanza statica. Uschia, di la pledadra da medias, Andrina Speziale, «preparain nus la midada per pudair cumenzar la construcziun regulara senza interrupziun».

L'atun duajan cumenzar las lavurs da construcziun regularas.

Nagin commentari pertutgant dispitas giuridicas da l'Axa Winterthur

Oriundamain vuleva l'assicuranza avair terminà ses edifizi nov enfin il 2018. La fasa da planisar e concepir il project da construcziun haja dentant duvrà dapli temp che previs al cumenzament dal project. Insumma betg commentar vul l'AXA che la raschun per il retard sajan differenzas cun vischins.

Las fatschadas, vesì da la vart da la plazza da la staziun da Cuira.RTR, I. Jaeger

La citad spera «ch'i va tras schlanc»

La situaziun pauc accoglienta en il center da la citad fa rumpatesta era en la chasa da la citad da Cuira. Uss saja da sperar ch'il procedere per approvar la dumonda da construcziun giaja da maniera schlanca, di il directur da construcziun da la citad, Tom Leibundgut. A partir dal mument che la dumonda vegn inoltrada, pudess durar la procedura 3 mais - quai dentant mo en il meglier cas, numnadamain quel senza reclamaziuns.

Il project duai vegnir preschentà l'entschatta da la stad

Actualmain preparia l'Axa Winterthur sia dumonda da construcziun ch'ella vul inoltrar il cumenzament da la stad. Al medem mument, uschia la pledadra da pressa, vegn l'Axa ad infurmar la publicitad co ch'il project vegn a vesair ora la fin dals quints.

Il schaner 2015 era vegnì preschentà il project «Capricorn» sco project victur da la concurrenza d'architectura per il nov edifizi a la plazza da la staziun. Il biro d'architectura Giubbini da Cuira prevesa da construir ensemen cun la Priora SA per 39 milliuns in cumplex da dus edifizis cun biros, butias ed abitaziuns.

In maletg dal project da quella giada na vuleva la pledadra da l'Axa dentant betg metter a disposiziun. Quel, uschia l'argumentaziun, na correspundia tut tenor betg pli al stadi actual dal project.

Quant grond che tut l'edifizi è na vuleva l'Axa betg comunitgar.RTR, I. Jaeger

Vid dapi il favrer

Dapi ch'ils 18 locataris han stuì bandunar l'edifizi sin cumenzament da favrer è il bajetg voluminus amez la citad da Cuira vid. Cun las firmas èn era partidas diversas persunas or dal cor economic da la citad. Mo il Globus aveva 90 engaschads. L'Axa aveva 45 collavuraturs sin il lieu. L'assicuranza vegn dentant a turnar en l'edifizi nov.

Artitgels legids il pli savens

Scrollar a sanestra Scrollar a dretga