Siglir tar il cuntegn

Header

cuntegn

Cuira: Nova lescha da polizia Dapli segirezza sin areal public a Cuira

Gia uss è la surveglianza cun maletg e tun senza identificaziun da persunas pussaivla. En futur duai la polizia da Cuira però er pudair identifitgar persunas cun agid da surveglianza cun tun e maletg – quai dentant mo sut cundiziuns fitg severas. Finamira da questa mesira èsi da stgaffir dapli segirezza sin ils areals publics.

L'identificaziun da persunas cun agid da maletg e tun è ina adattaziun a la lescha da polizia chantunala. La midada è ina da las novas mesiras da la revisiun totala da la lescha da polizia ch’il cussegl da la citad ha uss tramess en consultaziun.

Scumond da consumar alcohol la notg croda

La nova lescha da polizia prevesa plinavant ch' il scumond da baiver alcohol sin areal public a Cuira durant la notg tranter las 00:30 e las 07:00 croda. Quest scumond aveva la citad da Cuira introducì il 2008. Pervi da quella mesira aveva la lescha da polizia da Cuira survegnì il renum dad esser «la pli severa lescha da polizia da la Svizra».

La lescha da polizia revidida parzialmain è gia dapi il schaner da quest onn en vigur. La consultaziun da la revisiun totala da la lescha da polizia cuzza fin ils 30 da settember 2019.

RR novitads 09:00

Artitgels legids il pli savens