Siglir tar il cuntegn

Header

audio
Rathgeb cumpra anteriura villa da Stoffel
Or da Actualitad dals 25.02.2021.
laschar ir. Durada: 02:42 minutas.
cuntegn

Cuira Rathgeb cumpra anteriura villa da Stoffel

«Politicher da Cuira po tiers villa or dal conturn da Stoffel» – questa lingia grassa è stada da leger quest'emna sin il portal «Inside Paradeplatz». Scrit vegn dal minister da finanzas dal Grischun Christian Rathgeb e da l'investur da Val S. Pieder Remo Stoffel.

Quai che tuna fitg brisant è tenor cusseglier guvernativ e minister da finanzas dal Grischun, Christian Rathgeb fitg pauc brisant. El conferma ch'el haja cumprà la villa da la Resalis SA. En questa firma era l'investur Remo Stoffel fin il 2019 en il cussegl administrativ. Ina colliaziun che lascha gizzar las ureglias. Per quai ha er Christian Rathgeb chapientscha.

Il minister da finanzas dal Grischun e la persuna numnada ch'è er ina persuna publica... jau sun ì da quai or ch'ina ni l'auter sa tschenta dumondas.
Autur: Christian Rathgebcusseglier guvernativ

Christian Rathgeb fa dentant cler ch'i na dettia naginas colliaziuns er sch'il portal Inside Paradeplatz scriva ch'i na saja betg ì tut sco ch'i tutga cun la cumpra da la villa. El e sia dunna hajan fatg pliras offertas e la finala la meglra. Quai possia el er cumprovar cun ils documents necessaris. Tenor Inside Paradeplatz, ha la villa ina valita da 2,5 fin 3 milliuns francs. Ch'i dettia naginas colliaziuns, mussia er il fatg ch'el saja gia davent ch'el è cusseglier guvernativ il 2012 mintgamai ì en recusaziun (Ausstand) cura ch'igl è ì per l'investur da Val.

Impurtant è ch'jau sun gia dapi ch'jau sun en uffizi mintgamai ì en recusaziun cura ch'igl è ì per la persuna numnada.
Autur: Christian Rathgebcusseglier guvernativ

Quai na saja nagut nov ed er nagin misteri – ed er nagut spezial. Quai dettia anc magari cura ch'i dat colliaziuns dal passà u colliaziuns famigliaras. Cun tge che sia recusaziun haja da far na possia el dentant betg tradir. Uschia che Christian Rathgeb ha malgrà la colliaziun tranter sia villa e Remo Stoffel ina buna conscienzia – dentant eba, sco persuna publica saja da quintar cun dumondas criticas e quai saja er en urden.

RTR actualitad 12:00

Artitgels legids il pli savens

Scrollar a sanestra Scrollar a dretga