Il Ramadan è per ils muslims in dals pli impurtants mais en il chalender islamic. Far Ramadan e far gigina durant quest temp ha ina muntada profunda.
Empatia cun ils paupers
En il center dal far gigina èn ils paupers. Il president da la cuminanza islamica a Cuira Abdul declera:
Cun far gigina, chapeschian ins tge ch'i munta d'esser pover.
I duai tranter auter era gidar da viver pli conscient. Uschia duai ins er esser engraziaivel per tut las chaussas ch'ins ha.
Schubregiar il corp
In auter avantatg da far gigina dat il responsabel per la moschea a Cuira Hasan. El vesa la gigina sco ina pussaivladad da schubregiar il corp. Cunquai ch'ins na baivia e maglia nagut, vegnia la circulaziun dal corp a ralentar. Quai dettia ad el la pussaivladad da sa recrear.
Far gigina n'è betg per tuts
Ina pretensiun faussa che vegn fatga è che muslims ston senza obligaziun far gigina, dentant quai n'è betg il cas. A glieud che la gigina fa grond donn sco per exempel tar glieud che lavura fitg, tar scolars, tar dunnas en speranza ni era tar malsauns n'èsi betg lubì da far gigina. Els han simplamain da prender suenter ils dis. Quai san els per exempel far durant il mais suandant.
«Far gigina è in plaschair»
Melek Övünc ha 17 onns. Ella stat a Cuira e fa in emprendissadi en in'interpresa a Landquart. Ella ha ina gronda fascinaziun per il Ramadan. Ad ella plascha quella sfida persunala da tegnair la dira durant quai temp: «Far gigina è in plaschair». Numnadamain èsi be lubì da magliar tard la saira e baud la damaun durant ch'i è anc stgir. Ella n'è mai vegnida sfurzada da prender part. «Per mai èsi adina stà in vulair e betg in stuair».
Il mais da Ramadan 2019 ha entschet ils 5 da matg e cuzza fin ils 3 da zercladur. Silsuenter datti ina gronda festa da trais dis («Bairam») en cuminanza da la famiglia ed amis cun bler da magliar è da baiver.
Ord l'archiv:
RR actualitad 07:00