I saja il fauss mument per reducir las taglias, ha argumentà la presidenta da la cumissiun da gestiun Agnes Brandenburger envers RTR.
Il budget chantunal 2017 prevesia in deficit da 20,1 milliuns francs, il plan da finanzas 2018-20 deficits carschents ed i spetgia grondas investiziuns sco per exempel il bajetg per l'administraziun chantunala «Singergia» u la praschun a Realta. Plinavant na saja era betg cler tge consequenzas che la refurma sin la taglia d’interpresas III haja per il Grischun. Davart questa refurma decida la Svizra ils 12 da favrer.
Tenor la maioritda da la cumissiun da gestiun fiss quai meglier da spetgar giu la votaziun dal favrer e lura far ina refurma da l'entira lescha da taglia. I dovria numnadamain schon ina discussiuns davart il pe da taglia en il Grischun - betg mo quel per firmas, mabain forsa era per persunas privatas.
Regenza vul dar schlantsch
La regenza ha proponì da reducir per firmas il pe da taglia a partir dal 2017 – surtut per dar schlantsch a l’economia. Quai ha ditg la ministra da finanzas Barbara Janom Steiner enten preschentar il budget per l'onn 2017.
Per persunas giuridicas vul la regenza reducir ...
- la taglia dal chantun da 100% sin 90%
- la taglia da vischnancas da 99% sin 95%
- la taglia da baselgia da 10,5% sin 10%
Critica e laud da las partidas
La PS e la PCD han crititgà ils plans da la regenza. Per ils socialdemocrats è quai ina politica da privilegis per paucs. Ils cristiandemocrats fan attent als deficits chantunals ch'èn anc da spetgar ils proxims onns ed era ad eventualas mesiras da spagn.
La PLD e la PPS perencunter sustegnan las reducziuns da taglia per persunas giuridicas. Per ils liberals è quai in signal impurtant per las interpresas grischunas. La partida populara è cuntenta ch'il chantun reagescha sin la concurrenza da taglia cumpareglià cun auters chantuns.
Il cussegl grond decida en sia sessiun da december en chaussa.
RR novitads 15.00