Persunas giuvnas na s'interesseschan per il pli betg uschè fitg per la politica. Malgrà che las decisiuns politicas han grond'influenza sin lur vita van ils blers betg a votar. Il sistem dad «easyvote» vul midar quai. «Easyvote» porscha infurmaziuns neutralas, formuladas en ina lingua bain chapibla cun maletgs e videos e glistas da pro e contra.
Tenor il president da la citat, Urs Marti, è «easyvote» ina metoda directa e buna per cuntanscher la giuventetgna, damai che la lingua da la broschura saja giuvna e decleria ils punts essenzials.
Il project «easyvote» ha cumenzà l’onn 2011. Realisà vegn il project per gronda part da 150 giuvenils che lavuran en uffizi d’onur sco auturs per infurmar lur contemporans sur da temas e dumondas politicas.