Quai è dentant mo pussaivel, sch’il possessur vul quai. Lura po el laschar registrar dad in fotograf las localitads e suenter integrar ellas sin las chartas da google.
Mintga fotograf na po dentant betg far quai. Il fotograf sto esser certifitgà dal concern d’internet american. In dad els, che lavura per clients en l’entira Svizra, è Marc Cathomen. Sia interpresa PanoTour a Glion, che consista dad el e dus collavuraturs, fa maletgs e preschientschas dad internet per interpresas grondas e pitschnas.
Dal fotografar fin en streetview en quatter pass
L'entschatta però ina giada il resultat:
L'ustaria Mundaun a Castrisch è en posses da Reto Schildknecht e Jolanda Cabalzar. Els han vulì porscher l’invista virtuala a lur giasts - ni era giasts potenzials. Avant da visitar l'ustaria en il mund real pon ins uschia gia dar in sguard virtual en l'intern da l'ustaria Mundaun. Ina colliaziun cun la rait basta per ils giasts potenzials da tut il mund.
Ma avant dovra quai intgins pass:
Pass 1: Inspecziun da las localitads
Avant che Marc Cathomen entschaiva cun la registraziun fotografica da las localitads vegn inspectà - ensemen cun ils possessurs.
Pass 2: Fotografar
Sco emprim vegn l’entrada fotografada, lura las differentas stanzas. A Castrisch èn quai las duas stanzas d’ustaria e lura anc trais chombras per giasts. Marc Cathomen fa ord mintga posiziun fotografias en tuttas quatter direcziuns, volva la camera adina per 90 grads. Ord mintgina da quellas perspectivas vegnan fatgas mintgamai trais fotografias. Vul dir: mintgamai trais giadas la medema fotografia. Dentant betg dal tut: Ellas èn mo bunamain identicas, las fotografias. La differenza fa la glisch:
Per dir simpel: ins fa ord trais maletgs in singul. Pertge? Sin in maletg è la maisa memia stgira, sin l’auter la fanestra memia clera. E quai pon ins pli tard curreger grazia a las trais differentas fotografias. Da mintgin dals maletgs prendan ins mo las meglras parts.
Il fotograf va da stanza tar stanza. Pitschnas stanzas po el fotografar mo ord ina posiziun. Tar pli grondas stanzas fotografescha el ord pliras posiziuns. Adina en tut las quatter direcziuns.
Quai è ina camera tut normala, quella è gnanc chara, custa gnanc 1’000 francs.
Dus apparats accessoris èn dentant spezials. Quai è ina giada l'objectiv. Quel prenda si in maletg fitg lad e rodund. Plinavant è il stativ in model spezial. Quel sa lascha drizzar fitg exact - indispensabel per volver la camera mintgamai exact per 90 grads.
Pass 3: Elavurar ils maletgs
La blera lavur dat lura l'elavurar e preparar ils maletgs. Vid il computer vegn surtut la glisch curregida. Lieus stgirs cun pauca glisch vegnan fatgs pli clers. Lieus fitg clers, sco fanestras, vegnan fatgs pli stgirs.
Per in maletg da panorama (360 grads) dovra quai 12 fotografias. (guarda chaschina)
Per ch'ils maletgs vegnian mess fitg exact in vid l'auter, uschia ch'igl dat ord ils differents maletgs in, dovri puncts fix. En il cas normal fixescha il program quels. Quai po esser ina cazzola ni ina pitschna rusna vid la paraid. N'è la glisch betg buna u n'èn nagins puncts clers en la stanza, pon quels puncts vegnir fixads a maun cun la mieur.
Pass 4: Via google en l'entir mund
Cura ch’ils differents maletgs da panorama èn preparads (mintga localitad almain in), san quels far la via sin google. Quai dovra lura anc differents pass, per che tut saja collià endretg e ch’ins chattia lura era il local sin google street view e po ir dad ina stanza en l’autra.
Da l’ustaria Mundaun a Castrisch datti las duas stanzas da l’ustaria e differentas chombras da star sur notg d'explorar.
Per in object sco l'exempel da l'ustaria a Castrisch vegnan ins normalmain sin custs d'enturn 1’200 francs. Per in tal object cuzza quai bun in'ura da far tut las fotografias en il lieu. La gronda lavur han Marc Cathomen e ses collavuraturs suenter vid il computer. Davent da la registraziun dals maletgs enfin ch'ils visitaders da google street view han pudì visitar era l'ustaria virtuala a Castrisch ha quai cuzzà tschintg dis - dentant cun ina fin d’emna tranter en.