Che la cunvegna da basa cun l'UE è giud maisa senta tranter auter er la Hamilton a Panaduz. Sin dumonda dal Schurnal regiunal da SRF ha manegià il schef da la Hamilton, Andreas Wieland, che l'interpresa saja sa preparada durant ils ultims dus onns per quest scenari.
Entras questa lavur da preparaziun per il scenari, haja la gruppa da lavur procurà ch'ils products da Hamilton sajan er en avegnir fits per ils martgads en l'Uniun europeica. Quai haja custà tranter dus e trais milliuns francs. vitiers dettia en ils pajais europeics custs annuals per persunal ed auter. Plinavant possia Hamilton reagir uss main svelt sin ils basegns dals clients en l'exteriur.
Products ston vegnir approvads duas giadas
Enfin uss pudeva la Hamilton ir tras tut ils process en Svizra e lura survegnir ina lubientscha, in certificat per ses products. Perquai ch'i dat cunvegnas tranter la Svizra e l'UE, han quels lura valì er per l'Uniun europeica.
Senza cunvegna da basa, è quai en avegnir tut pli cumplitgà. l'UE sto approvar sezza ils products e quai munta dapli lavur per la fatschenta. Tut tenor stoppia la Hamilton er realisar ina societad affiliada en l'UE, per che quai giaja lura tuttina pli tgunsch.