- Interprendiders da construcziun grischuns han fatg cunvegnas da pretsch.
- I tanghescha radund 100 incumbensas ed bunamain tut las interpresas en l'Engiadina Bassa vegnan suspectadas d'esser accusadas.
- La WEKO vegn a decider il matg davart ina part dals cas. Quai pudess avair consequenzas sin las elecziuns da la regenza.
I sa tracta da cunvegnas da pretsch sistematicas en l'Engiadina Bassa. Tenor il vicedirectur da la cumissiun da concurrenza (WEKO) Frank Stüssi èn ils interprendiders da construcziun sa cunvegnids davart il pretsch en radund 100 cas. Quai tar lavurs da construcziun bassa sco er construcziun auta e tanghescha schebain privats sco er incumbensas publicas.
Tensiuns a las elecziuns da la regenza
Il matg vegn la WEKO a decider davart las consequenzas da las cunvegnas da pretsch e repartiziun da lavurs en Grischun. Quai pudess chaschunar inquietezza en connex cun las elecziuns da la regenza ils 10 da zercladur. Quai perquai ch'era intgins politichers èn suspectads d'esser involvids. Sco che la gasetta «NZZ am Sonntag» scriva tanghescha quai ils suandants:
- il candidat per la regenza Andreas Felix sco manader da l'uniun da construcziun grischuna. El fa dentant attent che l'uniun da construcziun na saja betg stada preschenta tar las sesidas nua ch'ins haja apparentamain fatg cunvegnas da pretsch. L'uniun haja mo envidà administrativ a las sesidas.
- ils actuals cussegliers guvernativs Mario Cavigelli e Jon Domenic Parolini vegnan suspectads dad esser infurmads gia dapi onns davart la chaussa. Mario Cavigelli fa dentant attent, che mo la WEKO haja ils instruments giuridics per agir. Il chantun haja però directamain suenter che las examinaziuns han entschet avert in post tar quel ch'ins po annunziar cas da suspect. E Jon Domenic Parolini declera ch'ins haja decidì da betg prender mesiras giuridicas u purtar plant tar la WEKO perquai che ils mussaments eran da lez mument manglus.
Il pli grond cas en Svizra
Il cas è tenor Stüssi il pli grond en il sectur d'acquisiziuns. I sa tractia da cartels che tangheschian bunamain tut las interpresas en la regiun. Ils pertutgads stoppian quintar cun chastis da plirs milliuns.
Cumenzà cun las examinaziuns ha la WEKO gia il 2012. Il 2015 han ils lura repartì il proceder an 10 cas.
RR novitads 06:00