Siglir tar il cuntegn

Chantun Cura che Tinca, Minusch e Rex èn seniors

Betg mo ils carstgauns, er ils animals da chasa vegnan pli e pli vegls. Saja quai pervi dal svilup en la medischina pervi da cassas da malsauns per animals ubain pervi da la tgira dals dents. In dals vegls è segiramain il chaval «Müschi» da Silvia Kessler.

Legende: Video Müschi, il chaval da Silvia Kessler abspielen. Laufzeit 2:59 Minuten.
Dals 13.11.2016.

In chaun grond po daventar set u otg onns vegl, in pitschen viva pli ditg, enfin 15 onns. In giat po vegnir anc pli vegl. En media tranter 17 e 20 onns. Ed in chaval, quel mora normalmain cur ch'el ha circa 20 onns. Ma betg Müschi, il chaval da Silvia Kessler n'ha betg main che 31 onns ed 8 mais.

Silvia Kessler è dapi l'onn 1988 la patruna da Müschi. Lura, cur che la stalla da l'anteriur patrun è vegnida serrada ha ella decis che quai chaval na possia betg ir en vendita: «Jau na saveva gnanca nua metter el. Jau saveva be ch'el è in Freiberger cun in caracter uschè dad aur, ch'jau hai simplamain stuvì cumprar el.» E bainspert ha Müschi lura chattà ses plaz tar la famiglia Brunold a Rodels nua ch'el passenta anc oz sia «pensiun».

Legende: Video La chogna Lady abspielen. Laufzeit 1:36 Minuten.
Dals 03.11.2016.

Ina veglia «Lady»

En pensiun è - en il vair senn dal pled - er Lady, la chogna Rottweiler. Ella passenta la fin da sia vita en la pensiun d'animals Arche a Cuira. E cunquai che Lady è ina chogna pulit veglia na vul nagin ella. Lady ha be 12 onns e mez. Quai è vegl, dentant betg fitg vegl per in chaun. Per in chaun cun ina istorgia sco Lady, saja quai dentant schon remartgabel, di Melanie Wildhaber l'emprendista da la pensiun d'animals. Lady patescha numnadamain da cancer ed artrosa.

Co prolungar la vita da l'animal da chasa

Er ils veterinaris conferman ch'animals vegnan ozendi, sumegliant al carstgaun, adina pli vegls. Tranter auter perquai ch'ils possessurs fetschian dapli per prolungar la vita da lur animals. Per exempel fan els mintg'onn ina controlla tar il veterinari, betg mo sche l'animal è malsaun. Ubain els tgiran ils dents.

Quels sajan d'impurtanza evidenta per prolungar la vita da l'animal. Sch'ins na guardia betg dals dents dettia quai tartagl. Quel donnegia lura las schunschivas e lura na po l'animal betg pli magiar u baiver endretg. «Pia, pli ditg ch'els pon magliar endretg il pavel natiral e pli ferm ch'el resta e pli tard ch'el sto murir», di Giochen Bearth, veterinari tar l'Uffizi per la sanadad d'animals.

Legende: Video Giochen Bearth, veterinari tar l'Uffizi per sanadad d'animals. abspielen. Laufzeit 1:28 Minuten.
Dals 03.11.2016.

Quai saja lura er in cler segn per ils possessurs, ch'i na giaja betg pli bain cun l'animal. «Sch'els ston bittar si ubain spizzan tuttenina fitg or dal gnif.» Mintgatant vegnan animals cun la vegliadetgna, sco in u l'auter carstgaun er, simplamain pli agens. «Per exempel giats che miaulan forsa pli agressiv perquai ch'els cumenzan a vegnir in zic dements.»

Na po l'animal dentant betg pli mangiar ubain sa mover ord atgna forza, saja meglier da durmentar el. «Per animals na dat quai betg in letg ch'ins po tgirar els», agiunta Bearth. Ed insumma, tar in animal pateschia la qualitad da viver fitg (gist tar in animal da fugia sco in chaval) sch'el na possia betg pli sa mover. I saja dentant da giuditgar da cas tar cas cun il possessur cura ch'igl è pli prudent da dar la squitta u cura betg.

Cassas da malsauns er per animals

Ozendi vegnia durmentà pli pauc, di er Men Bischof, veterinari da la clinica d'animals a Scuol. Ils animals vegnan pli vegls er perquai che la medischina saja sa sviluppada pli fitg en direcziun geriatrica. I dat pia dapli medischina per animals vegls. «Gist chemoterapia u radiografia as avess anc avant 10 ubain 15 onns probablamain betg fatg uschè svelt cun in chaun.»

Forsa er, perquai ch'ina chemoterapia custa bler dapli che da durmentar. 5000 enfin 7000 francs po quai custar. Durmentar custa perencunter be tranter 100 e 150 francs. I dettia dentant er adina dapli possessurs che laschan segirar lur animal tar ina cassa da malsauns per animals.

Cassas che surpiglian lura ils custs. Ma er en il cas d'ina chemoterapia vala tenor Bischoff: «Sch'ina terapia pudess prolungar la vita da l'animal da chasa be per insaquants mais n'investeschan ils possessurs betg plirs millis francs.»Dal reminent, quant vegl è voss animal da chasa?

Animals e lur vegliadetgna

quant vegl pon animals daventar - dals insects (entginas uras) fin al squagl da Grönlanda (400 onns)

I dat animals che vegnan fin 400 onns vegls.Grafica:RTR