Siglir tar il cuntegn

Header

video
Nov concept da sport - il chantun GR investescha dapli
Or da Telesguard dals 13.01.2016.
laschar ir
cuntegn

Chantun Currer, siglir e pedalar pir che mai

Tenor studis èn las Grischunas ed ils Grischuns las persunas svizras las pli sportivas. La regenza grischuna ha in grond interess da mantegnair e da rinforzar la valur dal sport per il chantun. Per quest intent preschenta la regenza in concept detaglià.

La lescha da promoziun dal sport, ch'è entrada en vigur il prim d'avust 2015, oblighescha la regenza da relaschar in concept per promover il sport ed il moviment. Quel è ussa avant maun.

22 finamiras d'optimaziun

Il concept per promover il sport preschenta la situaziun actuala e mussa ils puncts centrals e las mesiras per l'avegnir, per ch'il sport sa sviluppia vinavant e per che l'activitad da moviment da la populaziun creschia cuntinuadamain er durant ils proxims onns.

En il concept vegnan fixadas per ils proxims onns 22 finamiras e mesiras d'optimaziun, e quai en ils suandants secturs:

  • sport d'uffants e da giuventetgna
  • sport da scola
  • sport da massa
  • sport da prestaziun
  • occurrenzas da sport
  • infrastructura
  • infurmaziun e cussegliaziun

Garantir la qualitad d'instrucziun sportiva

Il chantun ha er formulà differentas finamiras per la promoziun d'uffants e da giuvenils. Per uffants pitschens duai uschia vegnir promovì l'access a purschidas da moviment che correspundan a lur vegliadetgna.

Il chantun vul er s'engaschar per la garanzia da la qualitad en l'instrucziun da sport en las scolas e per ina purschida da sport da scola voluntaria. Ultra da quai duai vegnir tegnì quint da l'impurtanza economica dal sport da naiv cun facilitar als uffants da scola l'access al sport da naiv.

Spazis per far sport en quartiers e vischnancas

La dumonda per sport e per moviment vegn dirigida er sur infrastructuras da sport adequatas. Qua po il chantun Grischun sa basar sin in concept per implants da sport che tutga en l'entira Svizra tar ils concepts precursurs.

Ultra dals stabiliments d'impurtanza chantunala duain er star a disposiziun spazis per sa mover en ils quartiers ed en las vischnancas. Tar ils stabilments da sport existents stoi vegnir guardà ch'els sajan bain accessibels e possian vegnir duvrads en differentas modas.

Promoziun dal sport sin donn e cust da la cultura?

Il nov concept è er impurtant per la finanziaziun da la promoziun dal sport. Tenor il cusseglier guvernativ Martin Jäger è la promoziun dal sport vegnida remartgablamain pli gronda ils davos 10 onns. Ils meds finanzials per la promoziun dal sport vegnan per part or dal preventiv ordinari. Ed in'autra part impurtanta vegn or dal fond da la lottaria naziunala. Ils davos onns ha il Grischun augmentà la cumpart or dal fond che va en favur dal sport. La cumpart per la cultura è persuenter vegnida pli pitschna ils davos onns.

RR novitads 11:00

Artitgels legids il pli savens

Scrollar a sanestra Scrollar a dretga