Surdar multas n’è betg gist ina bella lavur. Dentant ina lavur necessaria che vegn savens fatga da funcziunaris da vischnanca. Questas persunas n’èn betg policists u policistas communalas. Perquai èsi necessari ch’ellas fetschian in curs da basa.
Scolaziun pli profunda
Quests curs datti dapi 19 onns. L’entschatta cuzzavan els mo in mez di, quai n'era dentant betg suffizient. I deva numnadamain adina puspè reclamaziuns da la populaziun. Oz è quai in curs da dus dis e mez.
Persunas che vivan en vischnanca ston avair in caracter spezial. Els ston esser persvadents ed independents.
Igl è era pussaivel ch’in servetsch da segirezza surpiglia l’incumbensa da reparter multas. Quai custa lura natiralmain dapli.
Nagina incumbensa da siemi
Dus participants dal curs èn Ivan Flepp da Curaglia e Guido Casutt da Falera. Els n’han betg tschertgà l’incumbensa da reparter multas, ma i saja part da lur professiun.
Nus na tschertgain betg activamain. Cura che nus vesain tscherts cas, lura repartin nus las multas. Delicat n’è quai betg. Cler, ch'ins na reparta betg gugent multas.
Per ademplir la funcziun da surdar multas saja d’avantatg da restar ruassaivel, da declerar il process, dad esser segir da sasez e da tractar tuts tuttina. La finamira dal curs saja da relaschar ils participants e las participantas cun buna conscienza en lur nova incumbensa, cun ils dretgs guaffens per evitar situaziuns criticas.