La vischnanca da Haldenstein a l'ur da Cuira ha bun 1'000 abitants. Quest venderdi vegn decidì, sche la vischnanca duai fusiunar cun la vischina gronda, la citad da Cuira che ha bun 38'000 abitants. La fusiun chaschuna discussiuns en vischnanca. La gruppaziun «Pro Haldenstein» s'engascha cunter la fusiun. Ed era en la suprastanza communala n'èn betg tuts da la medema opiniun. Trais suprastants èn s'exprimids per la fusiun e dus cunter.
Haldenstein collavura gia oz stretg cun Cuira
La scola secundara, ils pumpiers, il lavuratori communal e las finanzas – en tut quels puncts collavura la vischnanca da Haldenstein gia cun la citad da Cuira. 70% da las finanzas da Haldenstein sajan gia dictadas da l'ester.
Las finanzas sco punct da discussiun
La dumonda da las finanzas è era gist il punct che chaschuna las bleras discussiuns. Il mument saja la situaziun finanziala da Haldenstein anc buna. Per ils proxims onns sajan planisadas investiziuns da 13 milliuns francs. Per pudair finanziar quai stuess la vischnanca auzar il pe da taglia. Quai è l'argument principal dals aderents da la fusiun.
Il comité cunter la fusiun, la «Pro Haldenstein», metta en dumonda l'argument da la situaziun finanziala.
La scola sco segund punct da discussiun
Il contract da fusiun tranter Cuira e Haldenstein vala per 15 onns. Quel prevesa che la scola primara resta vinavant a Haldenstein. Tge che capita cura ch'il contract scada, quai fatschenta ils adversaris da la fusiun. Tenor la citad da Cuira è previs che las scolas restan vinavant en ils quartiers da Cuira.
Ils 22 da november decida la radunanza communala davart la fusiun cun Cuira. La decisiun da la citad croda tar in gea da Haldenstein, tenor il president da la citad Urs Marti, enfin favrer.
RR actualitad 12:00
