Sco suletta partida ha la PS fatg opposiziun cunter il credit da 25 milliuns francs. Ils socialdemocrats han fatg bleras dumondas durant la debatta: Cura vegn decidì tgi che daventa host city? Co vesa ora il concept da traffic? Nua stattan las atletas ed ils atlets sur notg? La PS pretenda dapli infurmaziuns davart la candidatura grischuna.
La maioritad burgaisa dal Cussegl grond (PLD, PCD, PBD, PPS e PVL) argumentescha che gieus olimpics sajan ina schanza per l'entira economia grischuna. Ed i saja cler che betg tut ils detagls sajan anc enconuschents - quels vegnian pir elavurads il proxim temp.
Gia glindesdi ha il Cussegl grond debattà durant bunamain 4 uras. La finala è la decisiun d'entrar en debatta stada clera ed era la proposta dal deputà socialdemocratic Peter Peyer da renviar l'entir messadi a la regenza grischuna n'ha gì nagina schanza.
Il suveran grischun votescha ils 12 da favrer 2017 sur dal credit da 25 milliuns francs per preparar la candidatura grischuna per il gieus olimpics 2026.
Michael Pfäffli appellescha a curaschi civil
Il president dal Cussegl grond Michael Pfäffli (PLD) ha avert la sessiun da december cun in pled. El ha dà in sguard sin schabetgs da l’ultim temp ed ha per exempel tematisà la xenofobia en l’Ungaria, ils crims en Russia e las arrestaziuns en Tirchia. Dentant era en Svizra dettia tendenzas da guardar davent – enstagl da mussar curaschi civil. Pfäffli ha numnà sco exempel in um en in tren che ha survegnì fridas da plirs giuvenils entant che plirs passagiers n’han betg intervegnì.
Reducir taglias per persunas giuridicas
In'ulteriura tractanda che pudess procurar per discussiuns è il budget 2017 - surtut la proposta da la regenza da reducir il pe da taglia per persunas giuridicas. Cunquai che las finanzas sajan solidas (il budget 2017 preveda in deficit da 20,1 milliuns francs), vul la regenza dar schlantsch a l'economia cun distgargiar las persunas giuridicas.
La PLD e la PPS sustegnan quest intent. Resistenza datti da la cumissiun da gestiun dal Cussegl grond che propona da refusar questa proposta. Era PCD e PS èn da l'avis ch'i na saja betg il gist mument per 'regals da taglia'.
RR actualitad 12:00+