Siglir tar il cuntegn

Header

video
Cussegl grond fa lavur da corona
Or da Telesguard dals 15.06.2020.
laschar ir
cuntegn

Cussegl grond Alessandro Della Vedova fa curaschi al cumenzament da la sessiun

«Il Grischun na lascha betg pender il chau» – quests pleds ha il president dal Cussegl grond Alessandro Della Vedova duvrà al cumenzament da la sessiun da zercladur.

Il Cussegl grond ha tegnì ina minuta da silenzi per las unfrendas dal coronavirus. Silsuenter ha il president Alessandro Della Vedova engrazià a tut quellas persunas che han cumbattì la pandemia: Medis e persunal da tgira – dentant era persunas che han garantì il provediment dal mintgadi, sco vendidras, policists, postins, schuldads e bleras autras persunas.

Il cristiandemocrat oriund dal Puschlav ha dentant era fatg attent sin las differenzas tranter sid e nord – regiuns che na sajan betg pertutgadas tuttina da la crisa. El saja dentant persvadì ch’il Grischun dumognia questa crisa – communablamain.

Ina sessiun da 5 dis

La sessiun da zercladur dal Cussegl grond vegn stricta per las deputadas ed ils deputads, il programm prevesa numnadamain numerusas moziuns, revisiuns e debattas. E tut quai en nov ambient – la sessiun ha lieu en la Stadthalle a Cuira e betg en il bajetg dal Cussegl grond. Quai per pudair garantir la distanza tranter las persunas.

Autras mesiras da segirtad durant la sessiun èn, che mintga deputada e mintga deputà ha in dischinfectant sin ses pult, purtar mascra na ston ils deputads betg, san dentant sch'els giavischan quai. A pazients da risico vegn recumandà da trametter per questa giada il substitut a la debatta. Plinavant na dat quai er nagina tribuna per aspectaturs, tgi che vul guardar las debattas pofar quai cun in livestream sin la pagina dal chantun.

Corona er en il program

Ils emprims dus dis da la sessiun èn deditgads al tema corona. Vul dir: approvar tut las ordinaziuns d'urgenza che la regenza ha decidì ils ultims mais. En tut vai per radund 93 milliuns francs, saja quai per garanzias solidaricas, per cas gravants en l'economia, agid per canortas u ospitals. Las partidas na mettan betg en dumonda d'approvar quels credits uschia che quai vegn probablamain a dar ina clera decisiun, dentant betg senza discussiun.

Crimi da dretgira cuntinuescha

Suenter tractar corona è in'ulteriura tractanda interessanta sin il plan da lavur: la dispita entaifer da la dretgira chantunala. Las deputadas ed ils deputads han en quai connex da decider davart in rapport da la cumissiun da giustia pertutgant betg far la procedura da relaschar derschader Peter Schnyder da ses uffizi e davart d'ina dumonda da recusaziun envers la cumissiun da giustia tschentada dal president da la dretgira Norbert Brunner.

Brunner e Schnyder èn dapi passa in onn en dispita – Schnyder ha accusà Brunner d'avair sfalsifitgà ina sentenzia. Er en il Cussegl grond vegn quai probablamain a dar dispita tranter la PBD che stat davos ses derschader Peter Schnyder e la PCD ch'è da la vart da ses derschader Norbert Brunner. Schebain el ha sfalsifitgà il document u betg n'è dentant anc betg sclerì, la sentenzia na datti anc betg.

41 moziuns e 3 leschas

Il program ordinari, pia far revisiuns e tractar moziuns suonda lura en ils ultims dis da la sessiun. Planisà è, da tractar il rapport da gestiun ed il quint 2019. Lura reveder parzialmain la lescha da guaud e la lescha sur da la promoziun dal svilup economic en il Grischun. Ina terza impurtanta lescha è quella sur da la promoziun da la transfurmaziun digitala en il Grischun nua che quai va persuenter, da far ina reserva da 40 milliuns francs per investiziuns en projects digitals. Plinavant èn anc 41 moziuns sin il plan da lavur.

RTR actualitad 12:00