Cussegl grond: Avegnir da la Quodidiana ha dà da discutar

Gia avant in mez onn aveva il deputà Aurelio Casanova fatg ina dumonda a la regenza: El ha tranter auter vulì savair sch'ella è pronta da lavurar vid ina schliaziun per l'avegnir ed er sch'ella è tut tenor pronta da dar daners per salvar la Quotidiana.

divers exemplars da la Quotidiana Bild in Lightbox öffnen.

Legenda da maletgs: Er sch'ella è salvada per l'onn 2018 ha la Quotidiana procurà per discussiuns en il Cussegl grond. RTR, Flurina Cajochen

En sasez è quai gia tut café fraid cunquai che la dumonda a la regenza è gia mez onn veglia ed igl è gia cler che la Quotidiana cumpara er l'onn 2018. Tuttina hai da discussiuns sch'igl è giustifitgà da sustegnair ella cun daners publics u betg.

Per il deputà da la PPS, Mario Salis è la chaussa clera. El è da l'avis che la regenza na duai betg dar daners publics per sustegnair la Quotidiana.

«  La Quotidiana vegn propagada sco gasetta per la Rumantschia. Ella n'è però deplorablamain betg sa messa atras ni en l'Engiadina ni en il Surses... »

Mario Salis
deputà da la PPS

Che la Quotidiana saja ina gasetta mo per Sursilvans n'ha il deputà da la PCD, Marcus Caduff, betg laschà valair. Cumenzà haja tut cun redacziuns tuttina grondas en la Surselva sco en l'Engiadina.

«  La Quoditiana ha cumenzà cun ina redacziun numericamain tuttina gronda en l'Engiadina sco en la Surselva... »

Marcus Caduff
deputà da la PCD

La realitad ch'ils abunents han mancà en l'Engiadina haja lura sfurzà da reducir u serrar redacziuns en l'Engiadina. Las discussiuns davart sustegn per la gasetta dal di rumantscha u insumma il senn da quella han anc cuntinuà.

La finala ha il cusseglier guvernativ responsabel, Martin Jäger, lura anc prendì il pled: El ha punctuà l'impurtanza d'ina gasetta rumantscha er sco instrument per promover la lingua rumantscha sco tala. Ed, el ha appellà da leger e discurrer rumantsch e mirar ch'el restia vivs.

RR actualitad 08:00