Siglir tar il cuntegn

Header

Fermadas ston vegnir sanadas per garantir ina entrada en il bus senza barriera.
Legenda: Sutga da rodas Fermadas ston vegnir sanadas per garantir ina entrada en il bus senza barriera. Keystone
cuntegn

Cussegl grond Chantun gida da sanar fermadas da bus

La lescha federala pretenda da las vischnancas, ch'ellas saneschian las fermadas da bus uschia che persunas en sutgas cun rodas possian entrar ed extrar dal bus senza barriera. Il Cussegl grond dal Grischun ha concedì in credit da 25 milliuns francs per sustegnair las vischnancas finanzialmain d'adattar las fermadas da bus.

Las deputadas ed ils deputads han decis quai unanimamain. Sulettamain il liberaldemocrat e president da la citad da Cuira Urs Marti ha mess en dumonda, schebain quai fetschia senn da sanar las fermadas malgrà ch'ils bus sajan en il futur forsa tecnicamain sin il livel ch'els possian s'alzar ubain sa sbassar uschia, che quai na dettia nagina barriera pli.

Cusseglier guvernativ Mario Cavigelli ha respundì, che quai saja bain il futur da la tecnologia dals bus, dentant a vista mesauna dovria quai tuttina anc las rampas.

Planisà è da sanar radund in terz da las fermadas en il Grischun, en cifras èn quai circa 400. La finanziaziun supplementara è limitada sin la fin da l'onn 2025.

RTR novitads 20:00