Siglir tar il cuntegn

Header

Navigaziun

Entrada dal Cussegl grond.
Legenda: Keystone
cuntegn

Cussegl grond Dubel uschè blers daners per las fracziuns

Las fracziuns dal Cussegl grond survegnan dapli daners per preparar las fatschentas da la sessiun. Quai han deputadas e deputads decidì cun 67 cunter 42 vuschs (tar 5 abstenziuns).

Concret vegn la contribuziun che mintga fracziun survegn ad onn auzada da 4'000 sin 12'000 francs. La contribuziun che la fracziun survegn pro deputada e deputà crescha da 300 sin 500 francs ad onn. Quai vul dir: Ils custs muntan da nov 120'000 francs ad onn – quasi il dubel d’enfin uss.

Quests daners dovran las fracziuns per preparar las fatschentas avant las sessiuns, per exempel per pajar in expert che declera en ina sesida pli precis ina lescha.

Tgi survegn quants daners?

FracziunCommemberspro fracziun500 pro commemberTotal
PLD3612'00018'00030'000
PCD3012'00015'00027'000
PBD2312'00011'50023'500
PS1912'0009'50021'500
PPS912'0004'50016'500
PVL301'5001'500
Total12060'00060'000120'000

La proposta per insumma auzar questas contribuziuns è vegnida da la Conferenza dals presidents, quai vul dir dals schefs da fracziuns. Els han laschà far ina cumparegliaziun ed èn vegnids a la conclusiun che las contribuziuns en il Grischun sajan pli bassas ch'en auters chantuns.

PLD tuttina encunter

La fracziun liberaldemocratica ha per gronda part votà cunter l'augment, cun l'argument ch'i na saja betg il dretg mument. Suenter la decisiun dal Tribunal federal davart il sistem da maiorz en il Grischun spetgian differentas midadas il Cussegl grond, perquai fissi meglier da spustar la decisiun. Uschia la scheffa da fracziun Vera Stiffler (PLD)

Trumpads e surstads da questa midada d'opiniun èn sa mussads ils schefs da fracziun Remo Cavegn (PCD) e Gian Michael (PBD). Els han argumentà che la lavur preparativa vegnia actualmain savens fatga a moda voluntaria - uss saja temp per adattar las contribuziuns.

La PPS è stada da l'entschatta davent cunter in augment. Tenor Roman Hug na fetschia betg da basegn da «suflar si» l'entir sistem.

Il maletg mussa il resultat da la votaziun
Legenda: La PLD ha midà maina ed ha votà cunter la proposta d'auzar las contribuziuns. Nadja Cadonau

RR novitads 12:00