Suenter avair tractà pliras ordinaziuns d'urgenza da corona han las deputadas ed ils deputads dal Cussegl grond anc mess si il mardi il viertgel al tema corona. Quai cun ina ura da dumondas. En il center èn stadas dumondas co la populaziun po vegnir protegida d'ina segunda unda da corona, e cun tge consequenzas finanzialas ch'igl è da quintar a lunga vista - er per las vischnancas.
Il cusseglier guvernativ Peter Peyer ha dentant anc stuì appellar a la pazienza da las deputadas e dals deputads dal Cussegl grond quai che pertutga plans d'urgenza per ina pussaivla segunda unda. Il mument sajan tut ils uffizis vidlonder da elavurar scenaris pussaivels – e las mesiras latiers.
Er il minister da finanzas Christian Rathgeb ha stuvì dar in chanaster als deputads, che han vulì savair tge custs che spetgan en il futur anc las vischnancas pervi da corona. Er economs na possian anc betg dir quant autas che las consequenzas sajan lura propi – a mesa ed a lunga vista. Dentant las vischnancas hajan en il futur segir da quintar cun dapli expensas en il socialesser e damain entradas da taglia.