La conferenza da presidents dal Cussegl grond ha decidì oz: las elecziuns han lieu sco planisà l'avust. Quai ha RTR intervegnì da pliras deputadas e deputads. Cunzunt la partida socialdemocratica e la partida populara èn sa messas en fermamain per spustar il termin. Cun spustar las elecziuns dals derschaders sin la sessiun d'october empè da l'avust, avessan las partidas gì dapli temp, per tschertgar candidatas e candidats per ils post da derschaders. Ellas vulan numnadamain er, che tut ils derschaders vegnan barattads or. Far urden cun la dispita entaifer da la dretgira chantunala mondia be cun in nov start, perquai che tut ils derschaders sajan cumpigliads ed hajan betg dumagnà da schliar la dispita.
Cunter la proposta da spustar las elecziuns è la PCD stada. Spustar las elecziuns fetschia be anc pli grev da chattar candidats per la nova perioda d'uffizi che cumenzia gia l'entschatta da l'onn 2021. La PCD na vul er betg barattar or tut ils derschaders per betg chastiar quels che n'hajan betg malduvrà lur uffizi.
