Siglir tar il cuntegn
Inhalt

Chantun Cussegl grond lascha sclerir «veto per ordinaziuns»

Il Cussegl grond vul discutar la pussanza tranter la regenza ed il parlament. Deputadas e deputads han perquai decidì glindesdi saira da sclerir in uschenumnà «veto per ordinaziuns».

Cussegl Grond.
Legenda: Ils deputads dal Cussegl grond duain avair la pussaivladad d'avair il davos pled. RTR, Nadja Cadonau

Da principi è la repartiziun clera: Il Cussegl grond è responsabel per las leschas e la regenza per las ordinaziuns latiers – là nua ch’ils detagls vegnan descrits. En la pratica n’èn deputadas e deputads dentant betg adina cuntents cun la lavur da la regenza.

Maioritad per sclerir in «veto per ordinaziuns»

Las ordinaziuns che la regenza relascha na correspundian betg adina a quai ch’il Cussegl grond haja atgnamain vulì cun la lescha, è vegnì crititgà durant la debatta glindesdi saira. Perquai vuless ins ussa sclerir d’introducir in uschènumnà «veto per ordinaziuns». Sche la regenza relascha in’ordinaziun che na plascha betg, lura han deputadas e deputas il dretg d’in veto e l’ordinaziun vegn discutada en il parlament.

Ozendi enconuscha be il chantun Soloturn in tal instrument. Dentant era en il Cussegl naziunal vegn ponderà d’introducir in tal. Sco proxim sto ina cumissiun analisar questa pussaivladad e preschentar en insacura ina proposta al Cussegl grond.

RR novitads 20:00