L’onn 2015 aveva il Cussegl grond anc declerà sco nunvalaivla l’iniziativa. Questa decisiun ha dentant il Tribunal federal revocà, e perquai han deputadas e deputads puspè stuì tractar la fatschenta oz mardi.
La maioritad dal Cussegl grond è suandada a la regenza e propona al suveran da refusar l'iniziativa – tranter auter era per betg periclitar la pasch linguistica.
Nagina cuntraproposta
Ina minoritad da la cumissiun da furmaziun vuleva ina cuntraproposta: I duai bain vegnir instruì be ina lingua estra en scola primara – quai duai dentant esser stringentamain ina lingua chantunala. Quell'idea da Roman Hug (PPS) n'ha la finala gì nagina schanza en il Cussegl grond.
Betg spustar la fatschenta
Era la proposta ch'è vegnida sin maisa pir l'ultim temp han deputadas e deputads refusà – numnadamain la proposta da Martha Widmer-Spreiter (PBD) da spustar l'entira fatschenta per in mez onn ed avair uschia temp per novas soluziuns. L'idea era d'introducir in'instrucziun bilingua en las scolas rumantschas e talianas. Quai avess muntà ch'era scolas che valan actualmain sco rumantschas avessan introducì in'instrucziun bilingua rumantsch/tudestga. Il medem avess valì per il talian.
Il suveran decida probabel anc quest atun
Votantas e votants dal Grischun decidan probablamain ils 23 da settember 2018 davart l’iniziativa «mo ina lingua estra en scola primara». Andreas Gabriel da la Lia Rumantscha è cuntent ch’il Cussegl grond propona da refusar l’iniziativa ed è da buna speranza ch’il suveran vegni a suandar questa proposta. Andy Kollegger dal comité d’iniziativa è cuntent ch’il suveran po uss far la discussiun davart il cuntegn da l’iniziativa e la finala era decider. Martin Jäger, il schef dal departament d’educaziun crai er ch’il suveran vegni a refusar l’iniziativa sco quai ch’el ha era fatg en auters chantuns.
RR actualitad 12:00
