Siglir tar il cuntegn

Header

Video
Cumbat da concurrenza a Zernez occupa il Grond cussegl
Or da Telesguard dals 30.08.2017.
laschar ir
cuntegn

Chantun Cussegl grond sa decida cunter protecziunissem per glera

Cun 65:35 vuschs refusescha el l'incumbensa dal deputà Andreas Felix (PBD), ch'è er il mainagestiun da l'Uniun dad impressaris grischuna. Basa da la pretensiun è la controversa frequenta en las regiuns da cunfin: Nizzegiar la differenza da pretsch tranter Svizra ed exteriur per far affars en Svizra.

Per regiuns da cunfin, sco per exempel l'Engiadina Bassa para quai dad esser in problem existenzial. Concret vaja en l'incumbensa dal grondcusseglier Andrea Felix per l'import e l'export da gera e sablun. La concurrenza da material pli favuraivel, che vegn importà da l'exteriur per vegnir duvrà en la regiun, fa rumpatesta als impressaris indigens – uschia er a la SOSA Gera SA a Zernez:

Segir ch'i va sin il viv. Ins venda damain material. Sche quai va vinavant uschia ha quai consequenzas sin las plazzas da lavur.
Autur: Dario Togniniadministratur, SOSA Gera SA

Cun quai ch'il n'è betg scumandà dad importar tal material, aveva il mandat Felix in auter focus: El vuleva, ch'i vegnia desistì almain en lavurs per il maun public da glera o sablun importà da l'exteriur.

Cun refusar l'incumbensa è il Cussegl grond seguì a la proposta da la regenza.

Sa restrenscher a material indigen cunterfà la lescha

Sin basa da las leschas federalas en connex cun il martgà naziunal na saja quai betg pussaivel d'intervegnir en il martgà – ni per motivs da la politica da provediment ni per motivs ecologics.

En il Telesguard aveva Roland Conrad, anteriur grond cusseglier (PBD) e conpossessur da la SOSA Gera SA gia reagì sin la resposta da la regenza:

Igl è legal. Ma betg tut ch’è legal ha dad esser bun. Ins po er curreger tschertas chaussas a favur da la masteranza indigena. Uss èsi numnadamain uschia, ch’ils avantatgs èn tuts da la vart da l’ester e nus n’avain nagina schanza.
Autur: Roland Conradcumpossessur SOSA Gera & anteriur grond cusseglier

Il dretg da las acquisiziuns publicas federal e chantunal haja la finamira da promover la concurrenza e pretenda da tractar tuts tuttina. Uschia na saja quai betg pussaivel da crear avantatgs per singuls che sfalsifitgass il martgà.

RR novitads 12:00