Siglir tar il cuntegn

Header

cuntegn

Chantun Cussegl grond senza pled en chapitel puncto plan d'instrucziun

La regenza è cunter las iniziativas che vulan ch'il parlament decidia dapli en chaussa furmaziun e plan d'instrucziun. Tenor la regenza na correspundessia quai betg al sistem actual, fetschia tut pli cumplitgà e chaschunass blers custs.

Er en l'avegnir na duai il Cussegl grond betg avair in pled en il chapitel, cura ch'i va per dumondas da furmaziun. En in messadi per mauns dal parlament grischun propona la regenza da renviar las duas iniziativas «Buna scola Grischun» che pretendan ina cogestiun en impurtantas dumondas da scolaziun e plans d'instrucziun. Las ordinaziuns actualas garanteschian ch'il plan d'instrucziun vegnia elavurà dad experts e chattia accoglientscha en gronds tschertgels.

Nov plan d'instrucziun muntia gronds custs

Ultra da quai rendess in gea a las iniziativas pli cumplitgà tut ils process e chaschunass dapli custs. Ins stuess numnadamain elavurar in nov plan d'instrucziun. Il plan d'instrucziun 21 che duai vegnir introducì cun il proxim onn da scola stuess vegnir remplazzà, communitgescha la regenza.

Dapli cumpetenza per il parlament en chaussa «scola»

Las iniziativas «Buna scola Grischun – Participaziun tar dumondas da furmaziun impurtantas» e «Buna scola Grischun – Participaziun tar plans d'instrucziun» aveva il comité inoltrà il 2017. Tenor quellas duai il Cussegl grond survegnir la cumpetenza da decider cun lescha ubain via referendum facultativ en dumondas impurtantas, ed era la cumpetenza d'approvar ubain refusar in plan d'instrucziun.

Il Cussegl grond tracta il messadi durant la sessiun d'avust.

RR novitads 11:00

Artitgels legids il pli savens