La politica haja segir dad ir ordavant cun in bun exempel. La politica stoppia però era mussar tge che saja pussaivel da far – era durant la pandemia da corona, uschia Wieland.
Per l’entira sessiun vala però in obligatori da purtar mascras en l’entir bajetg dal Cussegl grond, damai che deputadas e deputads sesan pulit datiers in da l’auter. Persuenter èsi previs da far dapli pausas mintgamai duas avantmezdi e duas suentermezdi.
Decis che la sessiun ha lieu ha la conferenza da presidents. Ordavant aveva il president dal Cussegl grond Martin Wieland (PLD) ditg sin dumonda dad RTR, ch'el persunalmain speria da pudair far las debattas sco planisà – natiralmain cun consentiment da la media chantunala, da l'Uffizi da sanadad e las autoritads federalas.
La fin settember era vegnì decis che deputadas e deputads turnan per la sessiun d'october puspè en la sala dal Cussegl grond. Quai suenter duas sessiuns extra-muros en la halla da la citad a Cuira. Cunquai ch'i n'è betg pussaivel da tegnair 1,5 meters distanza, vala in obligatori da purtar mascras.
I dat dubis
Dentant tuttina han insaquantas deputadas ed insaquants deputads dubis - cunquai che la distanza è uschè pitschna. «Nus pudain er buc pretender da la populaziun da tener distanza e buc s'entupar en gruppas e nus dentant far exact quai», dat per exempel Gabriela Tomaschett da la PCD da ponderar.
Ina giada dapli vai per promover la cultura
Il tema principal da la sessiun è – ina giada dapli – la dumonda co promover la cultura en il Grischun. Resumà curt vai per quai: Deputadas e deputads ston decider sch’il concept da cultura duai cuntegnair ina summa totala per promover la cultura ubain sch’ils daners duain vegnir fixads mintg’onn via budget.
Trais onns suenter la lescha è uss il concept 2021-24 sin maisa. Quel descriva la variaziun culturala en il Grischun e definescha finamiras per ils proxims quatter onns. Quant che tut quai custa na vegn dentant betg numnà – e quai sapientiv: La regenza grischuna vul fixar la summa per promover la cultura mintgamai en la debatta da budget en il Cussegl grond.
Tut auter la cumissiun da cultura che ha preparà la fatschenta: Tut ils 11 commembers vulan fixar ina summa en francs e raps en il concept. Differentas opiniuns datti be tar l’autezza: Ina maioritad vul trais milliuns francs mintg’onn ed ina minoritad in milliun francs. Tenor plan discuteschan deputadas e deputads mardi suentermezdi questa fatschenta.