Siglir tar il cuntegn

Header

cuntegn

Chantun Cussegl grond vul cedels d'elecziun ch'èn da cruschar

Glistas d’emplenir or a maun per elecziuns da maiorz sco per exempel quellas dal Cussegl grond tutgan en il futur tar il passà – il Cussegl Grond ha numnadamain decidì oz da producir en futur cedels d'elecziun per cruschar.

Donald Duck, Elvis, il candidat dal circul electoral vischin u in num ch'è scrit uschè mal ch'ins na po betg leger el. Elecziuns da maiorz sco per exempel quellas dal Cussegl grond, nua ch'ins sto tschentar or a scrit a maun il cedel da votaziun cun scriver si il num dal candidat sajan ina veritabla funtauna da sbagls, è la PBD persvadida. Perquai ha ella lantschà da surdar a la regenza l'incumbensa da producir en avegnir cedels d'elecziun cun simplamain far cruschs davant ils nums dals candidats. Vul dir glistas cun nums squitschads e la pussaivladad da cruschar en candidats.

Dischavantatg per quels giusut la glista

Brigitta Hitz da la PLD è dentant stada critica e da l'avis che las glistas da cruschar sajan in dischavantatg per exempel per quels che stettian lura giusut la glista. I vegnia numnadamain cruschà tendenzialmain da sisum engiu u er ch'i saja pli cumplitgà da leger ina lunga descripziun co far las cruschs che da simplamain scriver si ils nums.

Tuttina ha la PBD survegnì vast sustegn per ses intent ed ha surdà a la regenza l'incumbensa cun 97 cunter 19 vuschs. In mument vai dentant anc fin ch'ils novs cedel vegnan en acziun. L'emprima giada vegn quai ad esser il cas pir tar las elecziuns dal Cussegl grond e da la regenza il 2022.

RR novitads 17:00

Artitgels legids il pli savens