Siglir tar il cuntegn

Header

Navigaziun

Legenda: Guardar il video Peyer:«I vul differentas mesiras». Durada 00:25 minutas.
Or da Telesguard dals 17.06.2019.
cuntegn

Cussegliaziun da mammas e babs Cummenzar da nov – cusseglia in'analisa

Tar la cussegliaziun da mammas e babs en il Grischun avevi dà dapi plirs onns charplina. Uss vegn in'analisa externa a la conclusiun ch'i veglia in nov start per propi ameglierar la situaziun. Quai communitgescha il Departament per giustia, segirezza e sanadad.

Pervi da charplinas constantas entaifer l'organisaziun da la cussegliaziun da mammas e babs en Grischun aveva decidì il chantun quest enviern da far guttas cun chaus: La fin da favrer ha il Departament per giustia, segirezza e sanadad incumbensà la firma da cussegliaziun turitgaisa Conaptis cun in'analisa fundada da la situaziun.

Analisa è sin maisa

L'analisa è uss sin maisa. Ella mussia ch'ils problems hajan gia cumenzà cun surdar l'incumbensa da prestaziun per la cussegliaziun da mammas e babs, scriva il departament en sia communicaziun a las medias.

Malgrà ch'omaduas varts, direcziun e cussegliadras, sajan sa stentadas per schliaziuns saja l'instituziun vegnida en ina dinamica e confusiun, scriva il departament e constatescha:

Il rapport maina a la conclusiun ch’in meglierament da la situaziun po be vegnir cuntanschì cun ina nova entschatta marcanta.
Autur: communicaziun da medias,departament per giustia, segirezza e sanadad

Auta qualitad da cussegliaziun stettia en il center

Il glindesdi avantmezdi èn vegnidas infurmadas las cussegliadras da mammas e babs en il Grischun dals resultats. Cun ils resuns da las cussegliadras da co far in tal nov start vegn la firma turitgaisa uss a cussegliar il departament tar il proxim pass en chaussa.

Er tar quest proxim pass veglia il departament en emprima lingia in'auta qualitad da cussegliaziun per las famiglias en Grischun.

RR novitads 16:00