Siglir tar il cuntegn

Header

In policist en vestgi alv en la naiv davos in placat da Tavau.
Legenda: Ils custs da segirezza per il WEF s'augmentan, sch'il president american, Donald Trump, vegn. Keystone
cuntegn

Custs da segirezza WEF Vegn trump, lura vegni pli char

Ils custs da segirezza per il Forum mundial d'economia muntan almain a 45 milliuns francs. Tar ina visita da Trump na tanscha quella summa dentant betg. E pajar, pajan er ils auters chantuns.

Ils custs da segirezza al Forum mundial d’economia a Tavau muntan ad almain 45 milliuns francs. Sch’il president american Donald Trump vegn era, pudessan quests custs anc s’augmentar. Tar l'ultima visita da Trump avant dus onns a Tavau han uschia ils policists dal chantun Turitg prestà bler dapli uras da servetsch ch'ils onns avant. Quai mussan retschertgas da Radio SRF.

Er ils ulteriurs chantuns pajan

La gronda part dals custs da segirezza surpiglian l’armada, la Confederaziun ed il chantun Grischun. Ma er ils ulteriurs chantuns sa participeschian a moda indirecta cun plirs 10'000 francs. A Tavau sez ed en ils conturns patruglieschan quels dis numnadamain policists da l'entira Svizra.

Il chantun Grischun indemnisescha ils ulteriurs chantuns per in servetsch d'in policist da 24 uras cun 600 francs. I sa tracta qua d'ina pauschala en il senn da la solidaritad svizra. Ils custs effectivs per il persunal dals chantuns èn numnadamain bler pli auts. Las pauschalas da di per ils policists, han en il chantun Basilea-Citad cuvert l'onn passà per 40% dals custs effectivs per in policist. Il rest ha Basilea paja sez.

WEF sez paja be ina pitschna cumpart

Da tut ils custs da segirezza surpiglia il WEF be ina summa fixa da bun 2,2 milliuns francs. Il Forum mundial d'economia è dals 21 fin ils 24 da schaner. Cunquai ch’il president american ha annunzià da vegnir al WEF quest onn, ston las mesiras da segirezza vegnir rinforzadas.

RTR novitads 08:00