Siglir tar il cuntegn

Chantun Custs memia auts per ils chantuns

La realisaziun dal las leschas davart persunas estras e davart l'integraziun chaschunian custs memia auts per ils chantuns. Tar questa conclusiun vegn la regenza grischuna.

Ina dunna curda che visita in curs da tudestg. Ins vesa la dunna mo da davosen.
Legenda: Las leschas d'integraziun e d'esters chaschunia custs memia auts per ils chantuns. Keystone

La regenza grischuna ha prendì posiziun tar las adattaziuns da l'ordinaziun davart l'admissiun, la dimora e l'activitad da gudogn da persunas estras sco era tar la revisiun totala da l'ordinaziun davart l'integraziun da persunas estras. En general beneventa la regenza grischuna las midadas proponidas en omaduas ordinaziuns.

Regenza beneventa mesiras d'integraziun

Novaziuns che vegnan sustegnidas èn en spezial la meglieraziun da las schanzas da fugitivas e fugitivs sin il martgà da lavur. Er a moda positiva valitescha la regenza il criteris formulads davart l'integraziun e davart las cumpetenzas linguisticas. Sco er la pussaivladad da sancziunar persunas estras che n'èn betg prontas da s'integrar.

Betg d'accord cun la finanziaziun

Betg d'accord n'è la regenza percunter cun il monitoring e cun las consequenzas finanzialas per ils chantuns. En il rapport explicativ vegnia declerà che las consequenzas finanzialas na possian betg vegnir quantifitgadas respectivamain che talas na sajan betg avant maun. En quest connex vegnian ils custs apparentamain sutvalitads, scriva la regenza. Las novas obligaziuns dals chantuns vegnian a chaschunar custs considerabels en il sectur d'integraziun.

Questas duas ordinaziuns èn las disposiziuns executivas da la nova lescha davart las persunas estras e l'integraziun ch'è gia vegnida concludida e che vegn previsiblamain ad entrar en vigur la stad 2018.

RR novitads 10:00