Siglir tar il cuntegn

Header

vaccas avon stalla
Legenda: Tschintg onns suenter la midada ha Markus Friberg decis da construir in nuegl liber. RTR/G. Gabriel
cuntegn

Chantun Da convenziunal al brumbel

Dapi il 2000 maina Marcus Friberg sia puraria a Breil tenor las directivas da Bio-Suisse. Tge midadas ha el insumma stuì far per che ses manaschi daventia bio?

«Sch'jau guard uss enavos n'è quai betg stà uschia ch'jau avess stuì metter sin il chau l'entir manaschi per midar tar bio», declera Marcus Friberg. Las midadas n'haja el er betg stuì far dad in di a l' auter.

Malgrà ch'i n'era betg ina pretensiun dal bio, ha Friberg decis suenter tschintg onns da construir in uigl liber. «Ils animals stattan e sa sentan numnadamain meglier uschia.»

Chavar ora empè da sprizzar las lavazzas

Damai ch'els hajan in pau problems cun lavazzas (zerclim) è la pli gronda sfida tenor Friberg stada ch'ins na dastgava betg pli duvrar meds per sprizzar. «Cun restar londervi e chavar ora ellas, vegn dentant er quai problem supportabels.»
Sper il pavel che na dastga betg esser sprizzà, dastgan purs da manaschis biologics era betg utilisar antibiotica sco profilaxa. Avant ch'el haja midà tar bio saja quai er gia capità tar el. En general manegia el ch'i vegnia ozendi duvrà en l'agricultura bler pli pauc antibiotica ch'anc els onns 1960 e 1970.