La Cussegliaziun da geniturs en il Grischun succeda cun ina nova incumbensa da prestaziun chantunala e vegn organisada sin plaun regiunal. Quai vala davent dal prim da fanadur sco l'Uffizi chantunal da sanadad scriva. Fin uss era la cussegliaziun organisada a moda centrala tras il post spezialisà KJBE.
Il basegn d'ina reorganisaziun saja sa mussada cun analisar la situaziun da l'anteriura «Cussegliaziun da mammas e babs». Tar il post da cussegliaziun grischun avevi numnadamain dà durant plirs onns charplina. L'analisa externa era lura vegnida a la conclusiun ch'i veglia in nov start per propi ameglierar la situaziun.
Las cussegliadras engaschadas enfin uss hajan tuttas survegnì in nov contract da lavur dals novs patruns en las regiuns. Ed il chantun procuria che la qualitad da la cussegliaziun saja adequata, scriva l'Uffizi da sanadad.
