Siglir tar il cuntegn
Inhalt

Chantun Damain dischoccupads il zercladur

En il Grischun è la quota da dischoccupaziun sa reducida per 0,6% sin 1,4%. En Svizra è la quota da dischoccupaziun sa reducida per 0,1% sin 3,1%.

Tavla.
Legenda: Centers regiunals per intermediaziun da lavur han dumbrà il zercladur damain dischoccupads. Keystone

En il Grischun èn stadas damain persunas senza lavur il zercladur. Il dumber da dischoccupads è sa reducì per 694 sin 1’526 persunas. Quai correspunda ad ina quota da dischoccupaziun da 1,4%, sco l'Uffizi per mastergn e lavur dal Grischun communitgescha. Il matg muntava la quota anc a 2,0%. Dals 1’526 dischoccupads èn stadas 703 dunnas ed 823 umens.

La quota da dischoccupaziun la pli auta han nudà la gastronomia (420), la branscha da construcziun (145) ed il sectur da la sanadad (118). Il zercladur han ins dumbrà 92 persunas dischoccupadas da lunga durada. Quai èn 4 persunas damain ch’anc il matg 2016.

Damain lavur curta

Er la lavur curta è sa reducida en il chantun. Il zercladur han 5 interpresas cun 46 emploiads introducì lavur curta. Il mais avant eran quai anc 6 interpresas cun 55 emploiads.

Er damain dischoccupads en Svizra

La dischoccupaziun è er ida enavos il mais passà. Il matg muntava la quota da dischoccupaziun anc a 3,2%. Quai communitgescha il Secretariat da stadi per l'economia SECO. Uschia èn stadas il zercladur 139'127 persunas registradas tar ils Centers regiunals per intermediaziun da lavur. Il zercladur 2015 muntava la quota da dischoccupaziun a 3,0%

RR novitads 08:00