Siglir tar il cuntegn

Header

cuntegn

Chantun Damain giasts tar las pendicularas grischunas

Malgrà aura grondiusa e bunas relaziuns da pistas ha la mancanza da naiv natirala procurà enfin Son Silvester per ina perdita da giasts da 3,8% tar las pendicularas grischunas.

La svieuta saja schizunt sa sminuida per 14%, cumpareglià cun l’onn passà ch’era gia stà magher. Tenor las Pendicularas Grischun han mancà cunzunt ils giasts dal di. Senza naiv artifiziala na fissi betg stà pussaivel da porscher als giasts la pussaivladad d’ir cun skis, ha declerà il president da las Pendicularas Grischun Silvio Schmid. La finala èn stads en funcziun 54% dals indrizs en il Grischun per ils sportists d’enviern.

Las entradas èn sa reducidas

Tar il dumber d’entradas fin Silvester han Arosa ed il Grischun central fatg in plus da 10% cumpareglià cun l’onn passà. Las ulteriuras regiuns percunter han pers. Enturn 5% damain nodan la Surselva e Tavau/Claustra, var 12% damain l’Engiadin’Ota, ed in minus da 17% sa resulta en l’Engiadina Bassa. Las entradas vegnan dumbradas, cura ch’in giast va per l’emprima giada in di tras la controlla.

Era sperditas tar il transport

Tar la svieuta che sa resulta dals transports han las pendicularas da l’Engiadina e da la Surselva pers var in tschintgavel cumpareglià cun l’onn passà. Mo in pitschen minus annunzian Arosa ed il Grischun central.

Las cifras che Pendicularas Grischun publitgescha cumpiglian 23 interpresas, e var 90% da la svieuta da transport en il Grischun.

Artitgels legids il pli savens