Per l’entira Svizra quinta il KOF quest onn cun ina reducziun main massiva che spetgà, era sch'il ferm franc svizzer fraina la conjunctura. Ils proxims 2 onns saja perfin da spetgar cun in augment da las pernottaziuns, scriva il KOF.
Pli paucs giasts europeics
La proxima stagiun d’enviern vegnan giasts ord la zona dal euro plitost ad evitar da far vacanzas en Svizra. Il ferm franc svizzer saja anc adina in dals gronds motivs da betg far vacanzas en Svizra, argumenteschan ils experts dal KOF. Ma tut en tut sajan las consequenzas pli pitschnas che prognostitgadas.
Hotelleriesuisse constatescha damain pernottaziuns
L’Associaziun dals hoteliers svizzers Hotelleriesuisse quinta cun damain pernottaziuns per la stagiun d’enviern. En ina retschertga tar ils commembers inditgescha mintga segund hotel d’avair damain cudeschaziuns per la stagiun d’enviern, communitgescha Hotellerissuisse.
60% dals hotels vulan dentant restar tar ils pretschs actuals; bun 40% inditgeschan da vulair sbassar ils pretschs. Sco Hotelleriesuisse scriva, correspundia quai a las prognosas publitgadas dal KOF il venderdi.
RR novitads 11:00 / 15:00