Siglir tar il cuntegn

Chantun Daners frestgs per Repower

Quai è necessari per restructurar il concern d'energia grischun. Il chapital vegn augmentà per almain 150 milliuns francs.

Legenda: Guardar il video «Il chantun n’è betg pli acziunari principal». Durada 3:57 minutas.
Or da Telesguard dals 30.05.2016.

Il concern d'energia Repower planisescha in augment dal chapital dad almain 150 milliuns francs. Cun questa mesira vul il concern grischun tranter auter rinforzar la basa da chapital e reducir ils debits.

Sco gia speculà l'emna passada, sa participeschan las ovras electricas dal chantun Turitg «EKZ» e l'investider «UBS Clean Energy Infrastructure» a la Repower. Ils dus acziunaris principals, il chantun Grischun e l'Axpo, s'engaschan tuttina vinavant per Repower. Els desistan però da lur dretg da cumprar novas aczias. Percunter s’obligheschan l’EKZ da cumprar novas aczias per 90 milliuns francs e la UBS-CEIS per 60 milliuns francs. Acziunaris da fin qua survegnan da nov per 5 da lur aczias 7 novas.

Legenda: Guardar il video «Dus novs investiders per Repower». Durada 2:13 minutas.
Or da Telesguard dals 30.05.2016.

Restructurar il manaschi

Cun questas mesiras stgaffescha Repower la basa per restructurar il manaschi. Repower vul sa sviluppar dad in producent da forza electrica en in'interpresa che proveda la populaziun cun energia.

Prevesidas èn tranter auter venditas e da sa concentrar sin ils martgads da l'Italia e la Svizra. L'onn passà ha Repower fatg ina perdita da 136 milliuns francs.

Ils 21 da zercladur 2016 decida in radunanza generala extraordinaria da la Repower davart l'augment dal chapital.

RR novitads 08:00


Cura la Repower fascheva anc «raps ch'i batta fieu»

Legenda: Guardar il video «Conferenza da la bilantscha 2011 da la Repower». Durada 2:01 minutas.
Dals 29.03.2012.

Sas anc? Igl n'è betg usche daditg. Las cifras avant tschintg onns neran era gia betg pli uschè bunas sco l'onn avant. Mo tuttina bler megleras che uss.