Sco quai che l'Uffizi federal per sanadad communitgescha è il dumber da persunas infectadas creschì da sonda sin dumengia per 374 persunas e munta a 1563 cas confermads (stan: 15.03.2020, 13:15). Ulteriurs 637 tests positivs spetgan anc sin conferma dal labor directiv. Tgeninas regiuns ch'èn pertutgadas na communitgescha l'uffizi betg pli, perquai ch'il virus saja derasà quasi dapertut. Uschia ch'il ristg da s'infectar saja dapertut dà.
Il dumber da las persunas mortas da la malsogna è creschida per 1 unfrenda en il Tessin e munta en l'entira Svizra ussa a 14 persunas.
43 cas confermads en il Grischun
En il Grischun èn registrads fin sonda 43 persunas infectadas confermà cun il coronavirus. Ulteriuras 4 persunas èn testadas positiv sin corona, spetgan però anc sin la conferma dal labor directiv (stan: 14.03.2020).
Cunquai che betg tut las persunas cun suspect da COVID-19 vegnan testadas pli, mabain mo persunas da gruppas da ristg u cun sintoms gravants, sa tracti d'in dumber minimal. La cifra è uschia plitost in indizi per il svilup che il dumber exact da persunas infectadas.
La strategia è da franar la derasaziun, cunquai ch'ella n'è betg d'evitar pli. Cun questa finamira ha il chantun Grischun decidì il pachet dad 11 mesiras rigurusas en il cumbat cunter il coronavirus.
