Siglir tar il cuntegn

Header

video
Corona malgrà vaccinaziun
Or da Telesguard dals 09.04.2021.
laschar ir
cuntegn

Dapli cas malgrà vaccinaziun Quatter cas tar persunas vaccinadas en center da seniors

En la Val dal Rain da Cuira hai dà en in center da seniors plirs cas da corona tar persunas gia vaccinadas.

En in center da seniors en la Val dal Rain da Cuira hai dà in augment da cas da corona. I sa tractia da quatter cussadentas e cussadents che sajan gia vegnids vaccinads il favrer. Quai ha communitgà l’uffizi da sanadad. El analiseschia anc ils cas. Las persunas pertutgadas hajan in decurs da la malsogna miaivel. Ellas sa chattian en isolaziun. En pli vala puspè in obligatori da purtar mascras en il center.

Las quatter persunas eran tuttas vegnidas vaccinadas cun il vaccin da RNA da Pfizer e Biontech. Quel duai sminuir il ristg da survegnir corona per 95%. En il Grischun èn passa 80% dals cussadents e las cussadentas da chasas d’attempads e da tgira vaccinads cumplainamain cunter Covid-19. Malgrà ch'i n'haja betg pli dà cas d'infecziuns en massa en chasas d'attempads, haja dà singulas infecziuns. Quai er perquai ch'i na dat nagin obligatori da vaccinar e betg tuttas persunas èn vegnidas vaccinadas.

Er suenter ina vaccinaziun pon ins anc vegnir malsaun, en spezial sch'ins ha survegnì be l'emprima dosa u sche la segunda n'è anc betg uschè ditg enavos. La protecziun cumplaina han ins pir radund 14 dis suenter ch'ins ha survegnì la segunda dosa. Ils cas vegnan uss examinads da l'uffizi da sanadad.

Augment da cas er en center da partenza Flüeli

Gievgia saira haja il contact tracing plinavant er registrà in augment da cas da corona en il center da partenza Flüeli a Valzeina. Il mument sajan 17 da 24 persunas testadas positiv sin il virus. L'uffizi da sanadad ha mess sut quarantina l'entir center ed isolà las persunas pertutgadas – quellas hajan in decurs miaivel dal virus. Quellas persunas che sajan vegnidas testadas negativas passentian lur quarantina en chombras singulas. Il mument saja il center occupà per radund 50%.

RTR novitads 12:00

Artitgels legids il pli savens

Scrollar a sanestra Scrollar a dretga