Dapli che 1'111 abunaments han pudì vegnir vendids

La campagna da l'abunament annual «Uffa» ha gì success per las pendicularas da Cuira. 1'500 abunaments èn vegnids vendids – l'acziun vegn uschia realisada.

Pendicularas Brambrüesch. Bild in Lightbox öffnen.

Legenda da maletgs: Il dumber minimal è vegnì cuntanschì e l'acziun da las pendicularas Brambrüesch sa vegnir realisada. Keystone

Per far dapli svieuta han las pendicularas Brambrüesch lantschà ina campagna cun abunaments annuals pli favuraivels. Per pudair realisar l'acziun, han els però stuì vender 1'111 abunaments enfin ils 30 da november 2017.

Acziun reussida

L'acziun è damai reussida. Sco quai ch'il president dal cussegl d'administraziun Tom Leibundgut ha ditg a la gasetta «Südostschweiz», han las pendicularas Brambrüesch vendì quest onn tschintg giadas dapli abunaments ch'ils auters onns. Enfin ils 23 da december pon ins anc cumprar ils abunaments annuals sut las cundiziuns spezialas.

I dat midadas: pli attractiv per famiglias

Fatg diever da l'acziun han cun 73% da las empustaziuns cunzunt partenaris e famiglias.Quai plaja a Leibundgut zunt fitg, sco la «Südostschweiz» rapporta. Tras l'acziun saja era cler a tge public che las pendicularas Cuira stoppian sa drizzar.

«  Nus essan londervi da megliurar la purschida al culm. »

Tom Leibundgut
President dal cussegl d'administraziun pendicularas Brambrüesch

Sin la proxima stad saja per exempel planisà ina plazza da gieu. Ultra da quai vegnia proxima stad averta la senda instructiva da palì. Ussa sa concentreschian las pendicularas dentant sin la stagiun d'enviern, ha ditg Leibundgut envers la «Südostschweiz».

Vegl e giuven han contribuì al success

Radund 83% da las empustaziuns sajan vegnidas dad abitants da Cuira. Ils 17% restants sajan da las vischnancas dals conturns sco Churwalden, Domat u Trimmis. Pli fitg sa distinguan ils participants da l'acziun en la vegliadetgna. Uschia è il pli vegl gia 91 onns ed il pli giuven nascha pir en december.

L'acziun cumpiglia pretschs spezials per persunas singulas, partenaris e famiglias.

RR novitads 17:00+